Öfugt við flestar aðrar þjóðir þá sækja Bretar helst í ferðir til Íslands yfir vetrarmánuðina. Í venjulegu árferði eru bresku ferðalangarnir hér á landi fleiri í febrúar en samanlagt yfir sumarmánuðina þrjá. Og ferðafrömuðir í Bretlandi sjá ekki annað en að þessi ásókn í vetrarferðir til Íslands haldi áfram.
Það er í það minnsta staðan hjá ferðaskipuleggjandanum Jet2 sem rekur bæði flugfélag og ferðaskrifstofu. Fyrirtækið tilkynnti nýverið að þarnæsta vetur yrðu farnar 135 ferðir til Íslands og í þeim yrðu samtals sæti fyrir 27 þúsund farþega. Það er aukning um 24 prósent frá því sem verður á komandi vetri. Til samanburðar flugu 262 þúsund Bretar frá Keflavíkurflugvelli árið 2019.
Þotur Jet2 munu fljúga til Keflavíkurflugvallar frá nokkrum breskum borgum og ofast eru ferðirnar fáar frá hverri og einni. Í vetur geta íbúar Birmingham, Manchester, Leeds, Birmingham, Belfast, Bristol, Edinborg og Glasgow komist til Íslands beint úr heimabyggð með Jet2. Sama á við þá sem búa í nágrenni við East Midlands flugvöllinn og þarnæsta vetur bætist svo við Íslandsflug frá Newcastle.
Í flestum tilfellum geta íslenskir farþegar nýtt sér þessar ferðir líka en stundum eru þær eingöngu í boði fyrir þá sem hefja ferðalagið í Bretlandi.
