Ennþá er unnið að samruna rútufyrirtækjanna Reykjavik Sightseeing og Allrahanda Gray Line en líkt og Túristi greindi frá um miðjan ágúst er ætlunin að móðurfélag þess fyrrnefnda, PAC1501 ehf. sem er í eigu framtakssjóðs á vegum Landsbréfa, verði langstærsti hluthafinn í sameinuðu félagi.
Þetta er ekki í fyrsta sinn sem horft er til samruna fyrirtækjanna tveggja því það ferli var komið langt á veg í árslok 2019 þegar upp úr viðræðum slitnaði.
Á þeim tíma hafði Samkeppniseftirlitið gefið grænt ljós fyrir viðskiptunum en Reykjavik Sightseeing og Allrahanda Gray Line eiga í samkeppni í akstri með ferðamenn á mörgum sviðum. Bæði hafa til að mynda sinnt sætaferðum milli höfuðborgarinnar og Leifsstöðvar.
Nú eru keyra hins vegar rútur Allrahanda Gray Line ekki lengur þessa leið. Í staðinn kaupir fyrirtækið sæti í ferðum Reykjavik Sightseeing til og frá Keflavíkurflugvelli að sögn Þóris Garðarssonar, stjórnarformanns Allrahanda Gray Line. Hann bætir við að fyrirtækið sæki sem fyrr farþega á hótel og stoppistöðvar á höfuðborgarsvæðinu en keyri svo að rútustöð Reykjavik Sightseeing við Skógarhlíð.
Aðspurður segir Þórir að Allrahanda Gray Line innheimti bæði og skili virðisaukaskatti af þessu sætaferðum líkt og áður. Það hefur Reykjavik Sightseeing aftur á móti ekki gert þar sem stjórnendur fyrirtækisins hafa litið á ferðirnar til Keflavíkurflugvallar sem almenningssamgöngur og þar með eigi þær að vera undanþegnar virðisaukaskatti. Á þau rök féllst þó Skatturinn ekki líkt og Túristi greindi frá í sumar. Ekki hafa fengist upplýsingar um hvar það skattamál er statt í kerfinu í dag.
