Erlend greiðslukort voru notuð til að greiða fyrir vörur og þjónustu hér á landi í síðasta mánuði fyrir nærri 38 milljarða króna. Það er viðbót um 7,3 milljarða kr. í samanburði við ágúst 2019 og hlutfallslega nemur aukningin um fjórðungi.
Af þessari viðbót fengu hótel og gististaðir 2,3 milljarða króna sem er mun meiri aukning, í krónum talið, en í öðrum flokkum eins og sjá má á grafinu.
Og þar sést líka hin neikvæða þróun í flokknum Ýmis ferðaþjónusta. Til þessa flokks heyra til að mynda ferðaskrifstofur og ferðaskipuleggjendur en skýringin á niðursveiflunni liggur ekki endilega í minni umsvifum í þessum geira heldur færslu á kortaviðskiptum til erlendra færsluhirða eins og Túristi hefur áður rætt. Tölur Rannsóknarseturs verslunarinnar byggja hins vegar aðeins á upplýsingum frá innlendum færsluhirðum.