Stjórnarmaður Icelandair býður nú flugmönnum 36 milljónir í árslaun ef þeir ganga til liðs við flugfélag sem hann reynir að koma í loftið vestanhafs. Þetta háa launatilboð skrifast meðal annars á skort á flugmönnum í Bandaríkjunum.
Hér heima er staðan önnur því í morgun auglýsti Play eftir 55 flugmönnum og nú þegar hafa tugir umsókna borist samkvæmt Nadine Guðrún Yaghi, samskiptastjóra flugfélagsins. Umsóknirnar berast frá bæði íslenskum og erlendum flugmönnum en Nadine segir að Play muni ráða flugmenn sem eru búsettir á Íslandi, óháð þjóðerni, en allir munu starfa samkvæmt íslenskum kjarasamningi.
Um 70 flugmenn voru við störf hjá Play í sumar og sá hópur mun því nærri því tvöfaldast fyrir næstu sumarvertíð. Þá verða þoturnar í flota félagsins tíu talsins eða fjórum fleiri en nú í sumar.
Play þarf því líka fleiri flugfreyjur og -þjóna og auglýsir því eftir 150 slíkum fyrir næsta vor en í boði eru bæði framtíðar- og sumarstörf. Stefnt er að því að 260 flugfreyjur og -þjónar verði í vinnu hjá Play næsta sumar en hópurinn taldi 150 manns nú í sumar.
