Hótel Ísafjörður hf býður gistingu á fimm stöðum – á aðalhótelinu við Silfurtorg 2 sem nefnist Torg. Þar eru 36 herbergi, á Horni við Austurveg, í nýuppgerðu húsnæði í gamla kaupfélagshúsinu, eru 24 herbergi, á Gamla gistihúsinu við Mánagötu 5 eru níu herbergi og á Mánagötu 1 svefnpokagisting fyrir 20 manns. Á sumrin bætist heimavist menntaskólans við og er kallað Hótel Torfunes. Stærstu eigendur Hótel Ísafjarðar eru Ari Wendel og hjónin Daníel Jakobsson og Hólmfríður Vala Svavarsdóttir. Hótelstjóri síðasta eitt og hálft árið hefur verið Kristján Þór Kristjánsson.
Túristi sest niður eftir hádegismat í tómum matsal Hótels Ísafjarðar við Silfurtorg, sem er um leið veitingastaðurinn Við Pollinn. Þetta er ekki fallegasta húsið á Ísafirði og innréttingar ekki með nýjasta sniði, en þarna hefur verið hótelrekstur frá árinu 1981, aðalhótel bæjarins á frábærum stað með góðri útsýn yfir Pollinn. Með þeim breytingum sem unnið er að á að glæða staðinn nýju lífi. Hótelstjórinn Kristján Þór kemur með kaffi handa okkur og sest við borðið. Yfir blikka perur, sem tekur varla að skipta út af því að staðnum verður brátt lokað vegna breytinga. Allt verður rifið úr veitingasalnum, innréttingar, klæðningar og gólfefni, veggir brotnir og ný leið opnuð að nýbyggingu sem risin er við hliðina.
Það á að hverfa frá því að starfrækja einn veitingasal sem nýst hefur fyrir morgunverð og veislur en bæta við nýrri vínstúku eða hótelbar hjá gestamóttökunni á jarðhæðinni. „Þetta hefur verið salur sem á að passa fyrir allt en fyrir vikið passar hann ekki fyrir neitt,” segir Kristján og bindur miklar vonir við „lobbíbarinn“ þarna á jarðhæðinni. Þar á fólk að geta sest niður, fengið sér drykk og léttar veitingar. Þessi nýja viðbót verður tekin í notkun í byrjun næsta árs. Í öðrum áfanga, sem eftir er að fjármagna, stendur til að breyta þaki hússins, gera hótelgarð með heitum pottum og sána.
Kristján Þór segir að nú í septemberbyrjun fari að draga úr gestakomum, þau séu að sigla inn í rólegasta tímann, frá október til loka desember, þó séu alltaf einhverjar ráðstefnur og hópakomur, auk sölumanna og iðnaðarmanna sem þurfi gistingu. Sumarið hefur verið gott í hótelrekstrinum á Ísafirði, segir hann, þó að veðrið hefði mátt vera betra. Útlendu gestirnir voru auðvitað fyrir löngu búnir að panta herbergi óháð því hvernig veðrið yrði en íslenskir ferðamenn taka kipp ef veðurútlit er gott, leita þá fyrst eftir gistingu og eru hissa á að það gangi ekki upp með stuttum fyrirvara.
„Síðustu tvö sumur kom hinsvegar í ljós að Íslendingar eru alveg tilbúnir að ferðast innanlands og áttuðu sig á því að það væri skemmtilegt og ekki svo dýrt miðað við að ferðast erlendis – þegar allt var talið.”
Þó að endanlegar tölur liggi ekki fyrir sýnist Kristjáni að erlendir ferðamenn hafi verið um 80-90 prósent gesta í sumar.
Enn er hótelrekstur á Ísafirði og annars staðar á Vestfjörðum mjög háður árstíðasveiflum. Það er allt fullt í fáeinar vikur á sumrin en svo kólnar hratt í rekstrinum í október. Það er ekki fyrr en skíðavertíðin hefst eftir áramót að aftur færist fjör í leikinn. Þetta flækir rekstrarmálin – ekki síst að hafa aðgang að starfsfólki til að sinna verkunum.
„Maður missir hæft starfsfólk. Þessar fyrstu vikur í september eru erfiðastar, skólafólkið sem var hér í vinnu, íslenskt og frá Póllandi og Slóvakíu er farið.”
Erfiðast segir hótelstjórinn að manna eldhúsið þegar aðeins er í boði vinna í fjóra eða fimm mánuði í senn. Ráða þurfi fjóra kokka auk þjóna og þjálfa starfsfólkið. Svo hverfur það eftir þennan stutta starfstíma og næsta ár byrjar allt upp á nýtt. Nauðsynlegt sé að gera veitingastaðinn rekstrarhæfan allan ársins hring.
„Ég byrjaði að auglýsa eftir kokkum í byrjun ársins. Einn Íslendingur sótti um en dró umsóknina til baka. Þetta er áskorunin – að ná í hæft starfsfólk. Ekki er nóg að lesa yfir ferilskrána hjá umsækjandanum. Ég hef hringt í þá staði þar sem viðkomandi hefur unnið og spurst fyrir um hann.”
Annars er Kristján Þór bjartsýnn á horfurnar i rekstrinum, hægt sé að lengja annatímann. Það hafi þegar tekist að fjölga gestum töluvert á veturna, t.d. hafi gönguskíðanámskeið í janúar, febrúar og mars reynst mjög vinsæl. Búist sé við svipuðu á næsta ári. Hótel Ísafjörður – Torg verður opnað eftir breytingar í janúar.
„Ég held að við eigum mikið inni í veitingasölunni. Við viljum fá heimafólkið aftur. Nýi barinn ætti að hjálpa til, fólk komi og fái sér drykk og borði létta rétti eða fínni mat.”
Við ræðum markaðsstarf Hótel Ísafjarðar. Kristján Þór segir að því ljúki aldrei.
„Markaðsstarfið felst í því að halda viskiptavinum ánægðum. Álit þeirra fer á netið þar sem allir geta lesið það. Þetta er auðvitað mjög áhugavert og ögrandi verkefni. Fólk er misjafnlega kröfuhart. Einn gestur kemur og horfir yfir morgunverðarboðið og dáist að úrvalinu, eggjum, beikoni og brauði, en sá næsti kvartar strax undan því ef ekki er til croissant. Ég átta mig stundum ekki á því hvort fólk haldi að það sé alltaf statt á fimm stjörnu hótelum. En þetta er bara skemmtilegt.”
Hótel Ísafjörður í byggingunni, sem reist var undir lok áttunda áratugsins, verður enn um sinn stærsta hótelið í bænum. En einhvern tímann kemur að því að fjárfestar sjái möguleikana í því að reisa stærra og nútímalegra hótel, jafnvel í gömlum stíl, þarna á Tanganum.
„Það kæmi ekki á óvart,” segir Kristján Þór um þær vangaveltur – að nýtt hótel rísi þarna nærri. „Vandinn við að reisa nýtt og stórt hótel er bara að ennþá þarftu að fjármagna reksturinn á fimm mánuðum. Það er meginskýringin á því að ný hótel hafa ekki verið reist á Vestfjörðum. En með bættum samgöngum, nýrri hringtengingu um Vestfirði sem opin verður árið um kring, má búast við að fleiri tækifæri onast í afþreyingu og þörf verði á meira gistiplássi.”