Finnair kynnti í vikunni uppstokkun á rekstrinum enda telja stjórnendur þess ljóst að það verði bið eftir því að loftrými Rússa opnist á ný. Það verður því áfram dýrt og flókið að halda úti tíðum ferðum til Austurlanda fjær frá Helsinki.
Finnarnir ætla því að reyna að draga úr kostnaði eins mikið og hægt er og útlit er fyrir að starfsfólki fækki. Hlutabréfin í finnska flugfélaginu lækkuðu í vikunni eins og þau hafa gert að undanförnu.
Það sama gerðist hjá SAS en það félag á í alvarlegum vanda. Stjórnendur þess sækjast nefnilega eftir því að komast í bandarískt greiðsluskjól svo hægt sé að ráðast í umfangsmikla fjárhagslega endurskipulagningu.
Það sem af er ári hefur gengi Finnair lækkað um 34 prósent og SAS um 57 prósent.
Eins og staða er í dag er Norwegian stærsta flugfélag Norðurlanda ef horft er til fjölda farþega. Þar á bæ tók fjárhagurinn miklum breytingum í heimsfaraldrinum því langstærsti hluti skuldanna var afskrifaður. Félagið er því að ná vopnum sínum á ný en engu að síður hafa bréf félagsins lækkað um 17 prósent eftir að tilkynnt var um 20 milljarða kr. hagnað á öðrum ársfjórðungi. Afkoman stóð ekki undir væntingum og bréfin í Norwegian héldu áfram að lækka í vikunni.
Sömu sögu má segja af gengi hlutabréfa í nýliðunum Flyr og Norse. Markaðsvirði Icelandair og Play hækkaði aftur á móti umtalsvert í vikunni en óseldu sætin í þotum félaganna tveggja voru færri í ágúst en raunin var hjá hinum norrænu félögunum eins og Túristi fjallaði um.