770 milljón króna samningur um þrif

Ræstingar á Leifsstöð og fleiri byggingum á Keflavíkurflugvelli voru hluti af útboðinu. MYND: ISAVIA

Nýverið fór fram útboð á ræstingum á Keflavíkurflugvelli og urðu Dagar hf. hlutskörpust í því með 91 stig af 100 mögulegum. Valið í útboðinu byggði að 30 prósentum á umhverfissjónarmiðum og í tilkynningu frá Isavia segir að líklega hafi umhverfisþáttum ekki áður verið gefið jafn mikið vægi í útboði sem framkvæmt hefur verið á Íslandi.

„Umhverfisþættirnir sem voru metnir sérstaklega voru eldsneytisnotkun og þar með kolefnisspor, umhverfisvæn efnanotkun og ISO 14001 vottun. Dagar voru eina fyrirtækið sem bauð í verkið sem var komið með ISO 14001 vottun. Isavia fékk sína ISO 14001 vottun fyrir um ári síðan,“ stendur í tilkynningu.

Þar segir jafnframt að Svansvottun hafi verið grunnkrafa í útboðinu og aukastig voru í boði fyrir þau fyrirtæki sem ganga lengra í umhverfismálum en lágmarkið segir til um.

„Þessar áherslur í útboði Isavia eru í skýru samræmi við metnaðarfulla sjálfbærnistefnu félagsins,“ segir Jófríður Leifsdóttir, deildarstjóri umhirðu og ásýndar hjá Isavia. „Við hjá Isavia höfum sett okkur það markmið að verða kolefnislaus í okkar rekstri árið 2030 og þetta er einn mikilvægur hluti af leið okkar þangað. Við erum að auka sjálfbærni í flugvallarsamfélaginu á Keflavíkurflugvelli og fá alla sem þar vinna með okkur í þá vegferð, því saman náum við árangri.“

Samkvæmt upplýsingum frá Isavia þá buðu Dagar hf. 256.628.167 krónur á ári fyrir samning sem tekur til 3 ára með möguleika á framlengingu. Heildarupphæð samningsins er því um 770 milljónir króna en verkið snýr að flugstöðinni við Keflavíkurflugvöll og einnig byggingar og skrifstofur Isavia á eystra hlaði flugvallarsvæðisins.

„Við fögnum áframhaldandi samstarfi við Isavia,“ segir Pálmar Óli Magnússon, forstjóri Daga. „Hreinlæti og ásýnd er mikilvægur þáttur í upplifun gesta flugvallarins og fékk hann viðurkenningu Alþjóðasamtaka flugvalla (ACI) fyrir hreinlæti á árinu 2021, nokkuð sem við erum afar stolt af. Isavia eru, eins og Dagar, með metnaðarfull markmið í umhverfismálum og er það því okkur sérstakt ánægjuefni að ISO 14001 umhverfisvottun Daga hafi talið í mati fyrirtækisins á þjónustuaðila til framtíðar.“