Með falli Wow Air í mars 2019 dró verulega úr framboði á flugi til Íslands. Það ár fóru um Keflavíkurflugvöll fjórðungi færri en metárið 2018 og erlendum brottfararfarþegum fækkaði um 14 prósent en sú talning er notuð til að leggja mat á fjölda ferðamanna.
Í Evrópu var 2019 hins vegar metár í fluggeiranum víðast hvar, alla vega einkenndist það ekki af miklum samdrætti eins og hér á landi. Af þeim sökum er í raun eðlilegra að horfa til ársins 2018 þegar við metum batann í íslenska flug- og ferðageiranum eftir heimsfaraldur.
Og þegar það er gert kemur í ljós að nýliðinn september kemur ekki eins vel út og mánuðirnir tveir á undan. Í júlí og ágúst sl. var farþegahópurinn á Keflavíkurflugvelli rétt rúmlega sjötíu prósent af því sem verið hafði sumarið 2018. Í september vantaði hins vegar um þriðjung upp á það sem var á metárinu.
Þróun var sú sama þegar horft er til mats á fjölda ferðamanna. Í júlí vatnaði bara sextán prósent upp á það sem var fyrir fjórum árum síðan en nú í september var samdrátturinn nærri fjórðungur eins og sjá má hér fyrir neðan.
Hver þróunin er á gistimarkaðnum kemur fyrst í ljós í lok mánaðar þegar Hagstofan birtir sínar tölur.
Annar mælikvarði á gang mála í ferðaþjónustunni eru upplýsingar um notkun erlendra greiðslukorta. Sá gagnagrunnur hefur þó látið á sjá eftir að fjöldi ferðaþjónustufyrirtækja flutti viðskipti sín frá íslenskum færsluhirðum eins og Túristi hefur áður rakið. Það vantar því töluverðar upphæðir inni í gagngrunninn sem er vísbending um að kortaveltan hafi aukist töluvert meira en opinberu tölurnar segja til um. Í september var velta á hvern ferðamann þó meiri en á árunum fyrir heimsfaraldur en töluvert minni en í fyrra.