Samfélagsmiðlar

Búið að veiða 148 langreyðar

Alþjóða dýraverndunarsjóðurinn fordæmir hvalveiðar við Ísland og segir að á vertíðinni sem er að ljúka hafi 148 langreyðar verið drepnar án þess að öruggur markaður sé fyrir kjötið. Því er fagnað að stjórnvöld ætli að kanna aðferðir við veiðarnar. Jafnframt eru þau hvött til að fara í saumana á því hvaða fjárhagslegir hagsmunir réttlæti hvaladrápið.

Ferðafólk fylgist með hval dregnum á land í Hvalfirði

Það vakti athygli fjölmiðla víða um heim þegar hvalveiðar hófust á ný í sumar á vegum Kristjáns Loftssonar. Ferðafólk hefur getað horft á það utan girðingar þegar hvert stórhvelið af öðru hefur verið dregið upp á vinnsluplan Hvals h.f. Þá hafa alþjóðleg dýraverndunarsamtök fylgst grannt með veiðunum og birt upplýsingar um þær.

Í fréttatilkynningu sem Alþjóða dýraverndunarsjóðurinn (IFAW, International Fund for Animal Welfare) sendi frá sér í gær segir að 148 langreyðar hafi verið drepnar á vertíðinni sem sé að ljúka. Samkvæmt heimildum IFAW tókst ekki að drepa fjórðung dýranna með einu sprengjuskoti og sé það lýsandi um þá grimmd sem felist í veiðunum.

„Það er óbærilegt að hugsa til þess hversu mikið þessi dýr kveljast. Rannsóknir hafa sýnt að það líði allt að 25 mínútur áður en hvalur drepst af sprengjuskoti í skutli,“ segir Sharon Livermore, yfirmaður deildar sem fer með verndarmálefni sjávardýra innan IFAW. „Einum hval var landað í sumar með fjóra skutla í skrokknum. Það gefur til kynna að margir hvalanna þurfa að þola langan og erfiðan dauðdaga.“

Mynd: ÓJ

Svandís Svavarsdóttir, matvælaráðherra, setti reglugerð í ágústmánuði um eftirlit með hvalveiðum. Matvælastofnun var falið að hafa eftilit með því að farið væri að lögum um velferð dýra. Fiskistofa sér um eftirlitið. Livermore fagnar því að stjórnvöld ætli að hafa eftirlit með þessum aðferðum sem notaðar séu við hvalveiðar hér við land. Hún leggur til að myndefnið sem veiðieftirlitsmenn safni verði birt opinberlega í vetur og farið verði yfir það af alþjóðlegum sérfræðingum til að tryggja gagnsæi.

„Niðurstöður þessara athugana þurfa að vera hafnar yfir allan vafa. Þá mun heimurinn allur sjá hversu grimmilegar og fjárhagslega óréttlætanlegar þessar veiðar eru. Við hvetjum matvælaráðherra til að sjá til þess að farið verði vandlega í saumana á fjárhagslegri hlið veiðanna með alþjóðlega viðurkenndum aðferðum. Það að Japan sé eini markaðurinn og að opna þurfi flutningaskipum með kjötið leið gegnum ís Norðurskautsins sýnir að þetta geti ekki borið sig efnahagslega eða þjónað hagsmunum Íslendinga,“ segir Livermore.

Mynd: ÓJ

Margir íslenskri ferðaþjónustu hafa gagnrýnt hvalveiðarnar harðlega í sumar. Sérstaklega var Lilja Alfreðsdóttir, ferðamálaráðherra, gagnrýnd fyrir stuðning við hvalveiðarnar og að standa ekki með ferðaþjónustunni. Bjarnheiður Hallsdóttir, formaður Samtaka ferðaþjónustunnar, sagði í frétt Túrista 6. júlí: „Það eru satt að segja mikil vonbrigði að ferðamálaráðherra skuli vera fylgjandi hvalveiðum á sama tíma og atvinnugreinin sjálf, og reynslumikið fólk innan hennar, hafa varað við neikvæðum áhrifum hennar á ferðaþjónustu og ímynd Íslands sem ferðamannalands.“

Forráðafólk hvalaskoðunarfyrirtækjanna hefur auðvitað margt áhyggjur af orðspori Íslendinga. Rannveig Grétarsdóttir, eigandi hvalaskoðunarfyrirtækisins Eldingar og stjórnarformaður Íslenska ferðaklasans, ræddi þetta í viðtali við Túrista 26. ágúst: „Fyrir mér eru hvalveiðar eitthvað sem tilheyrir gamla tímanum. Þetta eru gamaldags veiðar sem alþjóðasamfélagið umber ekki. Veiðarnar sem slíkar hafa ekki bein áhrif á okkar ferðir en þær hafa það á söluna hér á Íslandi og orðspor okkar. Ég veit að hvalveiðarnar valda vandræðum í utanríkismálum okkar og á starf allra sem eru að flytja út vörur. Við í ferðaþjónustunni erum mikið úti á markaðnum að selja og fáum viðbrögð fólks. Það væri auðvitað frábært ef við gætum bara verið stolt af sögunni og Kristján Loftsson breytti hvalstöðinni í ferðamannastað.”

Nýtt efni
Veitingaþjónusta

Íslenskt atvinnulíf er mjög háð aðfluttu vinnuafli. Það á ekki síst við um ferðaþjónustuna. Umsvif hennar væru mun minni ef ekki kæmu hingað útlendingar þúsundum saman til starfa á ári hverju. Samkvæmt Hagstofunni voru 35.233 starfandi í einkennandi greinum ferðaþjónustu á Íslandi í júní 2023. Þar af voru um 15.500 útlendingar.  Heildartalan yfir þá sem …

Áætlunarflug milli Akureyrar og London hófst í lok október og síðan þá hafa þotur Easyjet flogið þessa leið tvisvar í viku en engin talning fer fram á fjölda ferðamanna á Akureyrarflugvelli öfugt við það sem tíðkast á Keflavíkurflugvelli. Til að meta fjölda breskra ferðamanna í beina fluginu þarf því að styðjast við gistináttatölur Hagstofunnar en …

Frakkar fjölmenna til Íslands allt árið um kring og í fyrra flugu frá Keflavíkurflugvelli 99 þúsund farþegar með franskt vegabréf. Það jafngildir því að fimm af hverjum 100 ferðamönnum hér á landi séu franskir enda eru flugsamgöngur milli Íslands og Parísar tíðar og stefnir í að þeir verði óvenju miklar næsta vetur. Það eru því …

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …