Árið 2019 er reglulega notað til að meta hversu mikill batinn hefur orðið í ferðaþjónustunni eftir heimsfaraldur. Staðreyndin er þó sú að 2017 og 2018 voru metár í atvinnugreininni þegar horft er til fjölda ferðamanna. Fall Wow Air í ársbyrjun 2019 var þungt högg fyrir ferðaþjónustuna því félagið var mjög umsvifamikið í flugi til og frá Keflavíkurflugvelli.
Til marks um samdráttinn þá voru að jafnaði farnar 92 áætlunarferðir á dag frá Keflavíkurflugvelli í september árið 2018 en þær voru aðeins 67 ári síðar samkvæmt talningum Túrista. Í nýliðnum september fór meðaltalið upp í 69 brottfarir á dag sem þýðir að umferðin var um fjórðungi minni en fyrir fjórum árum síðan.
Þá stóð Icelandair undir 44 prósentum brottfara og hlutdeild Wow Air var 33 prósent. Erlendu félögin, þar með talið Primera Air sem Andri Már Ingólfsson rak frá Lettlandi og Danmörku, voru með 23 prósent af markaðnum.
Við gjaldþrot Wow Air náði Icelandair aftur yfirburðastöðu því tvær af hverjum þremur brottförum frá Keflavíkurflugvelli í september 2019 voru á vegum félagsins.
Núna hefur aftur dregið úr hlutdeildinni og var hún 58 prósent í september sem er ögn minna en mánuðina á undan. Play og erlendu flugfélögin bættu nefnilega við sig sitthvoru prósentustiginu.
