Það eru sjö norræn alþjóðaflugfélög skráð á hlutabréfamarkað og nú í byrjun viðskiptaviku er samanlagt virði þeirra 306 milljarðar króna. Í þessum hópi er Icelandair næstverðmætast og Play er miklu meira virði en hinir tveir nýliðarnir í hópnum.
Markaðsvirði Play er nú á mánudagsmorgni 10,7 milljarðar króna eftir að hafa lækkað um rúm sex prósent í síðustu viku. Þá fór gengi Flyr hins vegar mest niður á við eða um 7,4 prósent. Hlutabréf þessa norska félags eru því aðeins 2,6 milljarða kr. virði í dag en félagið hóf áætlunarflug í lok júní í fyrra líkt og Play.
Norse, sem byrjaði nú í sumar, er 4,6 milljarða kr. virði eftir hækkanir í síðustu viku en samanlagt eru Flyr og Norse metin á 7,2 milljarða króna.
Norwegian er aftur á móti verðmætast allra flugfélaga á Norðurlöndum því bréfin í því eru metin á 91,5 milljarð króna. Þar á eftir kemur Icelandair er bréfin í því félagi eru 77,2 milljarða virði í dag eins og sjá má á neðra grafinu.
Finnair og SAS koma þar á eftir en stjórnendur þess síðarnefnda reyna nú að fá heimild fyrir fjárhagslegri endurskipulagningu hjá bandarískum dómstólum. Takist það er ætlunin að efna til hlutafjárútboðs og þá mun virði núverandi hlutafjár rýrna um alla vega 90 til 95 prósent samkvæmt því sem fram hefur komið.
Staða Finnair er líka snúin því það félag gerir út á flug til Asíu en nú þegar rússnesk lofthelgi er lokuð þá er sú útgerð erfið. Stjórnendur finnska félagsins hafa því boðað niðurskurð sem felur m.a. í sér uppsagnir á skrifstofum félagsins.
