Þessa dagana kynna bandarísk og evrópsk flugfélög uppgjör fyrir þriðja ársfjórðung, tímabilið júlí til september. Reksturinn þarf að skila umtalsverðum hagnaði á þessum fjórðungi til að bæta upp tapið á öðrum tímabilum og óhætt er að segja að forstjórar flugfélaganna séu kampakátir með afkomuna í sumar. Sérstaklega tekjuhliðina því þar hafa menn sjaldan séð annað eins.
Rauði þráðurinn í uppgjörum flugfélaga eins og Delta, United og Lufthansa er nefnilega sá að farþegatekjurnar séu hærri en áður þrátt fyrir færri flugferðir en fyrir heimsfaraldur. Uppgjörin staðfesta það sem neytendur hafa fundið fyrir, fargjöldin hafa rokið upp. Engu að síður ferðast fólk enda fegið að vera laust við sóttvarnaraðgerðir.
Og hið háa farmiðaverð einkenndi ekki bara í júlí og ágúst, þegar flestir voru ferðinni, heldur líka í september. Í þeim mánuði voru fargjöldin í Bandaríkjunum til að mynda hærri en þau hafa verið á þessum tíma árs í 8 ár samkvæmt Financial Times. Í grein blaðsins er jafnframt bent á að takmarkað framboð haldi fargjöldunum uppi á sama tíma og eftirspurn sé meiri en forsvarsmenn flugfélaganna hafi almennt þorað að vona.
Samanburður við 2019 gefur ekki skýra mynd
Á Keflavíkurflugvelli voru batamerkin í september þó ekki eins skýr og þau voru mánuðina á undan þegar borið er saman við metárið 2018 eins og Túristi rakti nýverið. Samanburður við árið 2019 gefur ekki eins góða mynd af stöðunni því það ár einkenndist af mikilli niðursveiflu í íslenskum flug- og ferðageira vegna falls Wow Air.
Og það þýðir ekkert að horfa til ársins 2019 þegar skoða á þróun tekna hjá Icelandair. Stjórnendur félagsins bókfærðu nefnilega skaðabætur frá Boeing, vegna galla í Max-þotunum, sem sem farþegatekjur þetta ár. Það eru því bara stjórnendur flugfélagsins sem vita hverjar farþegatekjurnar voru í raun og veru árið 2019.
Kostnaðurinn líka hærri
Þessar óvenju háu tekjur flugfélaga að undanförnu eru kærkomnar enda sérstaklega dýrt að dæla eldsneyti á þoturnar. Þessari kostnaðarhækkun hafa flugfélögin hingað til komið út í verðlagið en nú er að sjá hvort neytendur muni áfram sætta sig við há fargjöld á sama tíma og efnahagsástandið er víða að versna, sérstaklega í Evrópu.