Rekstur Play í ár á alla vega tvennt sameiginlegt með umsvifum Wow Air árið 2015 – flugflotinn er jafnstór og bæði félög tóku fyrstu skrefin í Bandaríkjunum. Play ætlar sér hins vegar stærri hluti í vetur en lagt var upp með hjá Wow Air fyrir sjö árum síðan. En 2015 var annað árið af tveimur sem flugfélagið skilaði hagnaði.
Í flugferðum talið voru umsvif Play á fyrri helming þessa árs álíka og hjá Wow Air á sama tímabili fyrir sjö árum síðan. Þá flugu þotur þess síðarnefnda rétt rúmlega 900 ferðir frá Keflavíkurflugvelli en hjá Play voru þær 5 prósent færri. Munar þar miklu um hægari gang í janúar og febrúar í ár sem skrifast á neikvæð áhrif ómíkrón afbrigðis kórónaveirunnar.
Í mars síðastliðnum má segja að Play hafi tekið fram úr 2015 útgáfunni af Wow Air og síðan þá hefur bilið breikkað eins og sjá má grafinu hér fyrir neðan. Munurinn í nýliðnum september var umtalsverður.
Þá flugu þotur Play 308 ferðir frá Keflavíkurflugvelli til nítján áfangastaða en á dagskrá Wow air, í september 2015, voru 220 ferðir til þrettán borga. Bilið næstu mánuði verður álíka mikið.
Upphafið að endinum
Óhætt er að segja að rekstur Wow Air hafi gengið vel árið 2015 því félagið hagnaðist um 1,1 milljarð króna. Olíuverð var á þessum tíma um helmingi lægra en það er í dag, óvissa í efnahagsmálum heimsins minni og það var ekkert stríð í Evrópu. Rekstrarumhverfið því sannarlega hagstæðara en í dag.
Og við þessar góðu aðstæður blés Skúli Mogensen í herlúðra. Í nóvember 2015 var nefnilega tilkynnt að Wow Air hefði tekið á leigu á þrjár breiðþotur sem nýttar yrðu í tíðar ferðir til bæði San Francisco og Los Angeles. Áætlunarflugið til Kaliforníu hófst vorið eftir.
Síðar viðurkenndi Skúli þó að með þessum breytingum hefði hann farið út af sporinu. Félagið hefði átt að halda sama takti og áður.
