Strangar sóttvarnaraðgerðir tóku gildi í sumarlok árið 2020 og um leið dró verulega úr flugumferð. Í september innrituðu aðeins 10 þúsund útlendingar sig í flug frá Keflavíkurflugvelli og farþegar Icelandair voru svo fáir að félaginu hefði dugað að fljúga eina ferð á dag.
Neysla innanlands var því nær eingöngu á vegum heimamanna en samt sem áður nam erlenda kortaveltan 2,4 milljörðum króna í september 2020.
Sú upphæð jafngildir 2,7 milljörðum kr. í dag sem er tíund af erlendu kortaveltunni í nýliðnum september en þá mældist hún 26,8 milljarðar króna. Þetta er vísbending um að hluti þeirrar kortaveltu sem eignuð er ferðamönnum, til að mynda í úttektum Rannsóknarseturs verslunarinnar, er í raun á vegum íbúanna sjálfra.
Gera má fleiri fyrirvara við þessar kortaveltutölur en líkt og Túristi hefur bent á hefur notkun breskra greiðslukorta dregist óvenjulega mikið saman. Og það er líka staðreynd að fjöldi ferðaþjónustufyrirtækja hefur flutt viðskipti sín til erlendra færsluhirða og þar með kemur kortavelta þessara fyrirtækja ekki lengur fram í tölum Rannsóknarseturs verslunarinnar.
Ferðamenn eru því líklegast að eyða meiru hér á landi en áður og hefur Skarphéðinn Berg Steinarsson, ferðamálastjóri, kallað eftir mati á þeirri skekkju sem þetta veldur.
Ef við horfum hins vegar blint tölurnar um erlenda kortanotkun og berum saman við talningu á útlendingum á Keflavíkurflugvelli þá er niðurstaðan sú að meðaleyðsla hvers og eins útlendings nam 151 þúsund krónum í síðasta mánuði.
Það er samdráttur um sextán prósent í samanburði við september í fyrra þegar veltan nam 175 þúsund krónum þegar tekið er tillit til bæði verðlagsþróunar og gengisvísitölu. Aftur á móti kemur nýliðinn mánuður betur út en september á árunum 2016 til 2019. Þá eyddu ferðamennirnir að jafnaði 141 til 146 þúsund krónur.
Það er hins vegar lítill tilgangur í því að horfa til ársins 2020 eins og rakið er hér að ofan en það ár þó með í töflunni hér fyrir neðan.
Eins og gefur að skilja þá sýnir notkun greiðslukorta aðeins hluta af þeirri neyslu erlendra ferðamanna hér á landi. Þeir sem ferðast á vegum erlendra ferðaskrifstofa hafa til að mynda oft á tíðum borga fyrir stóran hluta ferðalagsins áður en hingað er komið.
