Farþegar á Keflavíkurflugvelli geta valið úr nokkrum ferðum á dag til fjölda borga bæði í Evrópu og Norður-Ameríku. Þetta mikla framboð skrifast ekki aðeins á útþrá Íslendinga eða straum ferðamanna til Íslands heldur þá staðreynd að rekstur Icelandair og Play byggir að miklu leyti á tengifarþegum, fólki sem ferðast milli heimsálfa en millilendir hér á landi.
Hlutfall þessa farþegahóps var ríflega fjörutíu prósent á Keflavíkurflugvelli fyrir heimsfaraldur. Hjá Icelandair var vægið ennþá hærra á árunum sem félagið var rekið með hagnaði, fór til að mynda upp í 58 prósent á þriðja ársfjórðungi árið 2017.
Það sem af er þessu ári hafa tengifarþegarnir í Leifsstöð ekki verið eins margir og áður eða um þrjátíu prósent af heildinni síðustu þrjá mánuði samkvæmt tölum Isavia.
Hjá Icelandair hefur hlutfallið farið uppá við síðustu mánuði, úr 43 prósentum í júlí og upp í 48 prósent í nýliðnum september samkvæmt því sem sjá má í mánaðarlegum farþegatölum félagsins.
Play upplýsir ekki um skiptingu farþegahópsins eftir mánuðum en út frá tölum Isavia og Icelandair má reikna út hver þróunin er þar á bæ. Og miðað við þá útreikninga þá hefur hlutfall tengifarþega hjá Play farið niður á við og endaði í 27 prósentum í september. Vægi tengifarþega var hins vegar hærra mánuðina tvo á undan eins og sjá má hér fyrir neðan.
Spurð út í þessa þróun þá segir Nadine Guðrún Yaghi, samskiptastjóri Play, að upplýsingar um skiptingu farþegahópsins séu ekki veittar mánaðarlega en verði mögulega birtar í tengslum við næsta uppgjör félagsins.
Í september flaug Play daglega til þriggja bandarískra borga og stóðu ferðirnar þangað undir 29 prósent af flugáætlun félagsins. Hjá Icelandair var vægi ferða til Bandaríkjanna og Kanada hærra eða 35 prósent samkvæmt ferðagögnum Túrista.