Bókunarhorfurnar ættu að stappa stálinu í fjárfesta, að þeir fái tiltrú á framtíðina þrátt fyrir að sótt sé að heimilum í Bretlandi með hárri verðbólgu, hækkandi orkureikningum og húsnæðiskostnaði.
Þegar horft var fram á versnandi efnahagshorfur í Evrópu höfðu sérfræðingar spáð því að flugbókunum myndi fækka mikið. Yfirleitt hefur eftirspurn á flugmarkaði fylgt efnahagsþróun í Bretlandi, sem er mikilvægasta markaðssvæði EasyJet, og einmitt nú er sannarlega kreppa í landinu. Hinsvegar hefur Reuters-fréttastofan eftir forráðamönnum EasyJet að bókanir á flugi á mikilvægasta ferðatímanum, frá apríl og út september, lofi góðu. Sérstaklega líta bókanir um komandi páska vel út, meðalfargjöld eru hærri en á þessu ári. Enn er þó of snemmt að draga víðtækar ályktanir þar sem ekki er um marga miða að ræða.
Góð sala er á miðum fyrir jól og hafa fargjöld hækkað að meðaltali um 18 prósent vegna mikillar eftirspurnar.
„EasyJet stendur sig vel á erfiðum tímum,“ sagði Johan Lundgren, forstjóri, í yfirlýsingu sem birt var í morgun. Neytendur munu halda fast í að geta farið í frí en þeir vilja fá gæði fyrir peningana.“
Hann varaði þó við því að flugheimurinn allur stæði frammi fyrir verðhækkunum vegna verðhækkana á eldsneyti, háu gengi dollars og hækkun launa vegna verðbólgu. Þau flugfélög sem færu best út úr þessum aðstæðum væri lágfargjaldaflugfélögin en þjóðarflugfélög eins og Air France og British Airways gætu lent í erfiðleikum vegna hærri grunnkostnaðar.
Fyrr í þessum mánuði hafði Ryanair, helsti keppinautur EasyJet, greint frá góðri bókunarstöðu í síðustu tveimur mánuðum ársins og að félagið byggist við vexti næsta eina og hálfa árið.
