Jómfrúarferð Icelandair til Raleigh í Norður-Karólínu var farin þann 12. maí og þá var lagt upp með að halda fluginu úti fram á haust. Í ágúst var svo gefið út að þotur Icelandair myndu fljúga til Raleigh fram yfir áramót en síðan yrði gert hlé á ferðunum fram í byrjun maí.
Nú hefur fyrstu ferð næsta árs hins vegar verið flýtt til 8. mars samkvæmt upplýsingum frá flugfélaginu en líkt og fram kom í viðtali Túrista við Boga Nils Bogason, forstjóra Icelandair, þá hefur félagið náð sterkri stöðu í Raleigh.
Og samkvæmt tölum frá flugmálayfirvöldum í Raleigh þá nýttu rétt um 28 þúsund farþegar sér ferðir Icelandair til og frá borginni í maí til október. Flestir voru þeir í september eins og sjá má hér fyrir neðan.
