Allt frá því í mars árið 2018 hefur Isavia fengið 41,2 prósent af tekjum Flugrútunnar af akstri frá Keflavíkurflugvelli til Reykjavíkur og þriðjung af tekjum Airport Direct á þessari sömu leið. Hlutföllin eru niðurstaða útboðs á vegum hins opinbera hlutafélags á aðstöðu fyrir sætaferðir frá Leifsstöð.
Og segja má munurinn á opinberum greiðslum rútufyrirtækjanna tveggja hafi verið ennþá meiri en sem nemur ofannefndri þóknun.
Stjórnendur Airport Direct hafa nefnilega ekki innheimt 11 prósent virðisaukaskatt af sínum tekjum á meðan Kynnisferðir, sem reka Flugrútuna, hafa rukkað skattinn. Nýverið bættist hins vegar virðisaukaskattur við farmiðaverðið hjá Airport Direct eins og sjá má á kvittunum sem farþegar fá.
Skýringin á þessu margra ára skattleysi er sú að forsvarsmenn Hópbíla-Reykjavík Sightseeing, sem á Airport Direct, hafa litið á sætaferðirnar milli Keflavíkurflugvallar og Reykjavíkur sem almenningssamgöngur og þar með eigi þær að vera undanþegnar virðisaukaskatti.
Skatturinn er hins vegar ekki á sömu síðu því í ársbyrjun hafði Túristi það eftir Snorra Olsen, ríkisskattstjóra, að það væri niðurstaða skoðunar embættisins á málinu að ferðirnar flokkist ekki sem almenningssamgöngur. Þegar spurt er í dag hver staða málsins er hjá Skattinum þá segir í svari embættisins að ekki sé heimilt að veita upplýsingar um mögulegar aðgerðir gegn tilgreindum aðilum eins og Airport Direct.
Sem fyrr segir er Airport Direct hluti af rekstri Hópbíla-Reykjavík Sightseeing en fyrirtækið er í eigu Pac1501 ehf., sem er í eigu framtakssjóðs á vegum Landsbréfa. Og allt frá því í sumar hefur verið unnið að því að Pac1501 ehf. kaupi rekstur Allrahanda Gray Line sem lengi hefur verið eitt stærsta hópbifreiðafyrirtæki landsins. Það félag hefur einmitt líka boðið upp á sætaferðir til og frá Keflavíkurflugvelli um langt árabil og þá undir heitinu Airport Express. Þar á bæ hefur 11 prósent virðisaukaskattur alltaf verið hluti farmiðaverðinu líkt og hjá Flugrútunni.
Og nú mun ríkissjóður líka fá sitt af sölu farmiða Airport Direct.
