Erlendur fjárfestir keypti á föstudaginn 257 milljónir hluta í Icelandair í gegnum verðbréfamiðlarann Auerbach Grayson. Nú í morgun gekk sami miðlari frá kaupum á 43 milljónum hluta til viðbótar. Fjárfestingin nemur um hálfum milljarði króna.
Ekki liggur fyrir hver endanlegur kaupandi er en viðmælendur Túrista á markaði telja líkur á að bandaríski vogunarsjóðurinn SFC Foresta Master Fund sé þarna á ferðinni. Sá keypti bréf í Icelandair sumarið 2021 fyrir um 650 milljónir og fóru þau viðskipti líka fram í gegnum ofannefndan miðlara, Auerbach Grayson.
Þá eignaðist Foresta Master Fund 1,4 prósent hlut í íslenska flugfélaginu en í dag er bandaríski sjóðurinn skráður fyrir 0,89 prósent og þar með 18. stærsti hluthafinn. Markaðsvirði hlutarins er í dag 648 milljónir kr.
Gengi hlutabréfa í Icelandair hefur lækkað um sjö af hundraði frá því að félagið birti uppgjör sitt fyrir þriðja ársfjórðung þann 20. október sl. Frá síðastliðnum föstudagsmorgni nemur hækkunin hins vegar fimm prósentum.
Uppfært: Í upphaflegri útgáfu fréttarinnar var talað um viðskipti upp á 300 milljónir króna en ekki hluta. Beðist er velvirðingar á þessu.