Útflutningur vöru og þjónustu reyndist meiri á fyrri helmingi ársins en Seðlabankinn hafði gert var ráð fyrir í spá sinni í lok sumars. Þessi aukning skrifast helst á þá staðreynd að útflutningur á þjónustu jókst meira en búist var við eða um liðlega 73 prósent. Þar spilar ferðaþjónustan stóra rullu eins og útskýrt er í nýrri útgáfu Peningamála sem Seðlabankinn gaf út í morgun.
„Þessi kröftugi vöxtur þjónustuútflutnings endurspeglar áframhaldandi bata í ferðaþjónustu sem tók hratt við sér á öðrum ársfjórðungi með auknu flugframboði á sama tíma og COVID-tilfellum tók að fækka á ný,“ segir í Peningamálum.
Þar er jafnframt bent á að tekjur innlendra flugfélaga af farþegaflutningum jukust töluvert á öðrum fjórðungi ársins og að heildartekjur af ferðaþjónustu námu um 94 prósentum af tekjum sama tímabils á árinu 2019 á föstu gengi. Ferðamenn voru þó færri núna en meðalútgjöld á hvern þeirra hins vegar töluvert meiri en fyrirfaraldur og dvalartíminn lengri.
Það eru þó ekki víst að þessi þróun sé ekki komin til að vera því í Peningamálum er bent á að vísbendingar séu um að útgjöld ferðamanna á þriðja ársfjórðungi hafi lækkað lítillega og færst nær því sem var áður en faraldurinn hófst.
Stjórnendur í ferðaþjónustu brattir varðandi fjárfestingar
Í september kannaði Seðlabankinn áform fyrirtækja um fjárfestingar og niðurstöðurnar sýna töluvert meiri aukning útgjalda til fjárfestinga en kom fram í samsvarandi könnun í febrúar og mars sl. Og þetta á sérstaklega við um stjórnendur í ferðaþjónustu og flutningastarfsemi.
„Könnunin bendir jafnframt til þess að stjórnendur í samgöngum, flutningum og ferðaþjónustu séu bjartsýnastir á fjárfestingaráform í ár,“ segir í Peningamálum.
Gera áfram ráð fyrir 1,9 milljón ferðamanna
Árið 2018 var metár í íslenskri ferðaþjóustu þegar horft er til fjölda ferðamanna. Þá voru þeir rúmlega 2,3 milljónir en það met fellur á næsta ári ef spá greiningafyrirtækisins Intellecon gengur eftir.
Spá Seðlabankans fyrir næsta ár er hófstilltari því þar er gert ráð fyrir 1,9 milljón ferðamanna eða um 200 þúsund fleiri en reiknað er með í ár. Segja má að sérfræðingar Seðlabankans séu á sömu síðu og Bogi Nils Bogason, forstjóri Icelandair, varðandi fyrrnefnda spá um nýtt metár í fjölda ferðamanna á því næsta.
„Mér finnst þetta ekki raunhæf spá. Við verðum að horfa til þess að nú í sumar og haust var mikil uppsöfnuð eftirspurn að koma fram. Margir sem höfðu ekki ferðast í 2 ár og voru að nýta uppsafnaðan sjóð til ferðalaga. Sá sjóður verður ekki til staðar næsta sumar og á sama tíma eru hagkerfi víða um heim í verri stöðu en áður,“ útskýrði Bogi Nils í viðtali við Túrista nýverið.