Nú í byrjun viku er markaðsvirði þeirra sjö norrænu flugfélaga sem skráð eru á hlutabréfamarkað um 380 milljarðar króna. Hækkunin frá því í síðustu viku nemur um 25 milljörðum kr. þrátt fyrir að gengi hlutabréfa í norska félaginu Flyr hafi fallið um 73 prósent.
Þar með er virði félagsins rétt um 750 milljónir kr. en skýringin á þessu falli er boðað hlutafjárútboð félagsins þar sem núverandi hlutafé verður í raun þurrkað út.
Á sama tíma og Flyr lækkar þá hækkuðu bréfin í Finnair og SAS og það sama gerðist hjá Norwegian sem er líkt fyrr verðmætasta flugfélag Norðurlanda. Markaðsvirði þess, nú í byrjun viku, er 118 milljarðar króna en hafa ber í huga að íslenska krónan hefur veikst og þar með verður virði erlendu félaganna hærra í krónum talið.
Bæði Icelandair og Play lækkuðu í síðustu viku en það síðarnefnda gaf út á fimmtudagskvöld að stærstu hluthafar félagsins myndu leggja því til aukalega 2,3 milljarða króna. Af þeirri upphæð koma 300 milljónir frá lífeyrissjóðnum Birtu.
