Í tvö og hálft ár fylgdi Nýja-Sjáland mjög ströngum sóttvarnaaðgerðum. Nú hefur að fullu verið aflétt öllum takmörkunum á landamærum vegna kórónafaraldursins. Ferðafólk er ekki lengur beðið um að fylla út eyðublöð um bólusetningar og fyrri ferðir. Landið er þar með opið öllum sem ekki hafa látið bólusetja sig. En þó að landamærin hafi verið opnuð á Nýja-Sjálandi er gestum gert ljóst að ekkert verði eins og áður. Nýsjálendingar vilja umskapa ferðaþjónustuna á eyjunum fögru og gera hana sjálfbæra.
Fyrir heimsfaraldur var Nýja-Sjáland mjög vinsæll áfangastaður. Á árunum 2016 – 2019 komu um 11 milljónir ferðamanna í heimsókn. Íbúar landsins eru hinsvegar aðeins fimm milljónir. Í hinn ægifagra Milford-fjörð, með bröttum fjöllum, fossum, regnskógi og fjölbreyttu dýralífi, komu risavaxin skemmtiferðaskipin í röðum. Fjöldi skipakoma nærri fjórfaldaðist á 13 árum og voru orðnar 133 árið 2019. Það stefndi í að um ein milljón gesta kæmi árlega á þetta óspillta og fagra landsvæði. En þá kom Covid-19 og enginn túristi var á ferli.
Auðvitað fylgdi mikill efnahagslegur sársauki ströngum sóttvarnaraðgerðum. Ferðaþjónustan sagði upp fjórum af hverjum tíu starfsmönnum og tekjurnar minnkuðu um helming á fyrsta árinu. En fólk gaf sér tíma til að endurmeta stöðuna.
Íbúarnir sjálfir kunnu því vel að geta sjálfir notið hafnarbæjanna sem margir höfðu liðið fyrir mikinn átroðning ferðafólks sem kom með skemmtiferðaskipunum. Og sjálf ferðaþjónustan hlustaði á íbúana.
„Við höfum sem starfsgrein lagt við hlustir og tekið mið af því sem sagt hefur verið í sumum samfélögunum um vöxtinn í komum ferðamanna fyrir heimsfaraldur og hver áhrifin hafa verið á líf fólks og umhverfi,“ segir Rebecca Ingram, framkvæmdastjóri Samtaka ferðaþjónustunnar á Nýja-Sjálandi, eða Aotearoa, eins og landið heitir á maórísku. „Breytingar hafa verið gerðar til að tryggja að landsmenn geti verið stoltir af ferðaupplifun fólks í heimsóknum til Nýja-Sjálands,“ segir hún á ferðavef frönsku fréttastöðvarinnar Euronews.
Lög hafa verið sett sem banna fólki að tjalda hvar sem er í náttúrunni og sveitarfélög birt leiðbeinandi reglur til að halda troðningstúrisma í skefjum. Þannig hefur verið lagt til að í Milford-fjörð verði gestafjöldi á dag takmarkaður við 4.000 manns og að gjald verði innheimt af útlendingum. Þá hafa fyrirtæki í ferðaþjónustu á Nýja-Sjálandi mörg skrifað undir skuldbindingar um að fylgja reglum um sjálfbærni.
Þannig hafa Nýsjálendingar notað ráðrúmið sem gafst í heimsfaraldrinum til að endurhugsa ferðaþjónustuna. Útlendir gestir eru boðnir velkomnir en vinsamlega er farið fram á að þeir ferðist um af meiri nærgætni en áður tíðkaðist: Stígi varlega til jarðar.