„Fólk er að spyrja eðlilega, hvað ætliði að gera við peninginn? Við segjum bara, nákvæmlega ekki neitt. Hann fer inn í banka þannig að við getum sýnt að það hafi vantað 20 milljónir dollara í reksturinn vegna hækkunar olíunnar innan ársins. Núna erum við búin að bæta það upp. Það er hin stutta skýring.
Ég stend alveg við það að við þurfum ekki þessa peninga til að borga neitt eða uppfylla einhver skilyrði í samningum. En að vera komin með lausafjárstöðuna á sama stað og í viðskiptaáætluninni, sem við kynntum í hlutafjárútboðinu í fyrra, þar sem búið er að þurrka út þessi áhrifin af hækkun olíunnar, þýðir að félagið er að fara að klára þetta vaxtarverkefni.
Fjárfestar væru ekki að setja meiri pening í félagið ef þeir teldu eitthvað að í rekstrinum. Ég veit ekki hvaða fyrirtæki myndi ráða við að helsti kostnaðarliðurinn tvöfaldaðist á stuttum tíma eins og gerðist í okkar tilviki. Að sjálfsögðu skiptir þetta máli, það væri rugl að halda öðru fram,“ svarar Birgir Jónsson, forstjóri Play, spurður út í hlutafjáraukningu upp á 2,3 milljarða króna (nærri 16 milljónir dollara) sem framundan er.
Sú upphæð bætist við þá rúmlega 10 milljarða sem fengust í tveimur útboðum í apríl og júní í fyrra. Þá kynntu forsvarsmenn Play fjárfestum sviðsmynd sem gerði ráð fyrir að félagið yrði rekið með hagnaði í ár.
Það er löngu ljóst að það gengur ekki eftir en það var fyrst á fimmtudaginn í síðustu viku sem áætlun um rekstrarhagnað á seinni hluta ársins var tekin aftur, meðal annars vegna lægri tekna.
„Ef allt væri í takt við þessi áætlun, nema farþegatekjurnar lægri og olíuverðið það sama og fyrir stríðið í Úkraínu, þá værum við hlæjandi,“ segir Birgir þegar hann er spurður úti í frávikin frá útboðsgögnunum í fyrra.
Samkeppnin nær ekki að snúa Play niður
Sem fyrr segir þá reyndust tekjur Play á þriðja ársfjórðungi lægri en gert var ráð fyrir en á sama tímabili hafa farþegatekjur Icelandair aldrei verið hærri. Birgir vill þó meina að samanburðinn við Icelandair sé ekki sanngjarn að öllu leyti.
„Icelandair er mjög flott fyrirtæki sem er með sitt sölukerfi sem búið er að byggja upp í 85 ár. Það væri algjör hroki að segjast ætla að ná sama árangri á okkar fyrsta heila sumarfjórðungi þar sem við erum að staulast í gang með sex flugvélar og tengiflug.“
Ertu ekkert hræddur við að þau hjá Icelandair fái blóðbragð í munninn og verði mun harðari í samkeppninni, til dæmis með lægra verði en fargjöldin þar hafa verið mjög há að undanförnu.
„Þetta er nákvæmlega það sem okkar hluthafar eru að segja. Þeir segja, við trúum á þetta og láta því inn aukið fjármagn svo fólk fari ekki að verða hrætt við að kaupa miða eða samkeppnin reyni að snúa okkur niður á stuttum tíma eins og þú ert að lýsa. Það er verið að senda skilaboðin um að við erum komin til að vera og höfum styrkin til að klára þetta,“ segir Birgir að lokum.
Líkt og Túristi greindi frá í gær þá ætlar lífeyrissjóðurinn Birta að leggja Play til 300 milljónir af þeim 2,3 milljörðum króna sem félagið fær inn sem nýtt hlutafé. Sjóðir á vegum Íslandssjóða leggja einnig sitt að mörkum.
Tengdar greinar: Ólík upplifun Boga og Birgis á stöðunni í sumarlok