Nú hafa sex af þeim sjö norrænu flugfélögum sem skráð eru á hlutabréfamarkað skilað farþegatölum fyrir október. Ennþá vantar upplýsingar frá Flyr í Noregi en forsvarsmenn þess félags hafa róið lífróður síðustu daga og reynt að sannfæra fjárfesta um að setja meira fé í reksturinn.
Það tókst á endanum en þó ekki með þeim hætti sem lagt var upp með. Það stefnir því í að félagið þurfi á innspýtingu að halda enn á ný í lok vetrar.
Sætanýtingin hjá Flyr hefur verið í lægri kantinum frá því að félagið fór í loftið í lok júní 2021 en Play, sem fór af stað á sama tíma, hefur náð betri árangri hvað þetta varðar. Og í október fór sætanýtingin hjá Play upp fyrir Icelandair enda lækkaði hún þar á bæ.
Spurður um þá breytingu þá bendir Guðni Sigurðsson, upplýsingafulltrúi Icelandair, á að framboðið í október hafi aukist verulega milli mánaða. Í september nam framboðið 84 prósentum af því sem var á sama tíma árið 2019 á meðan október var á pari við það sem var fyrir þremur árum síðan.
„Það er helsta skýringin fyrir því að nýting í október er ekki jafn sterk og mánuðina á undan í sögulegu samhengi. Við leggjum hins vegar meiri áherslu á að horfa á heildartekjur heldur en sætanýtingu eina og sér. Sætanýtingin gefur ákveðna vísbendingu en það sem er mikilvægara í okkar rekstri eru sterkar einingatekjur,“ bætir Guðni við.
Sem fyrr er sætanýtingin hjá SAS og Finnair nokkru lægri en hjá íslensku félögunum og Norwegian eins og sjá má hér fyrir neðan.
Óseldu sætin hjá Norse eru sem fyrr of mörg því að jafnaði voru aðeins sex af hverjum tíu sætum í þotum félagsins skipuð farþegum í október. Það er samt framför frá því í september en það skrifast að hluta til að minni umsvif.