Tekjur Play á þriðja ársfjórðungi, júlí til september, stóðu ekki undir áætlun sem skrifast helst á of hátt hlutfall farþega sem eingöngu millilenda á Keflavíkurflugvelli á leið sinni milli meginlands Evrópu og Bandaríkjanna. Þessir tengifarþegar skila Play nefnilega ekki eins miklu og erlendir ferðamenn á leið í Íslandsreisu líkt og fram kom í máli stjórnenda flugfélagsins þegar uppgjör sumarvertíðarinnar var kynnt í þarsíðustu viku.
Play birtir ekki sundurliðun á farþegahópnum í mánaðarlegum flutningatölum sínum en það gerir aftur á móti Icelandair og líka Isavia. Þar með fæst góð mynd af því hversu hátt hlutfall tengifarþega er hjá Play enda engin önnur flugfélög en þau íslensku sem nota Leifsstöð sem skiptistöð.
Og það sést af þessum tölum að hlutfall tengifarþega hjá Play var mun hærra í ágúst en það var í júlí og september líkt og Túristi hefur áður farið yfir. Í ágúst var þriðji hver farþegi Play á leið alla leið yfir Atlantshafið sem var nokkrum prósentustigum hærra hlutfall en hina mánuðina eins sjá má hér fyrir neðan.
Þar sést líka að síðasta mánuði, október, fór hélst vægi tengifarþega á sömu slóðum eða undir þrjátíu prósentum.
Hjá Icelandair lækkaði hlutfallið aftur á móti umtalsvert í október eða úr 48 prósent í 38 prósent sem er í takt við það sem gerðist árið 2019. En líkt og fram kom í viðtali Túrista við Boga Nils Bogason, forstjóra Icelandair, þá er framlegð þess félags af tengifarþegum alls ekki alltaf minni en af öðrum.
„Í leiðakerfi Icelandair eru um 700 tengimöguleikar og það er því ekki hægt að horfa á þá alla eins. Við erum með ákveðna stöðu á vissum mörkuðum þar sem við erum einfaldlega að bjóða upp á langbestu tengingarnar og bestu vöruna. Staðan er önnur annars staðar, tökum sem dæmi London og New York. Þar er framboð af beinu flugi mjög mikið og við því í allt annarri stöðu en á ýmsum öðrum leiðum, til að mynda í Raleigh því framboð á Evrópuflugi frá því svæði er mjög lítið,“ útskýrði Bogi Nils.
