Besta nýja flugfélagið

Birgir Jónsson, forstjóri Play, tók á móti verðlaununum í gær.

Play hefur verið valið besta nýja flugfélagið af CAPA, Center for Aviation, sem eru alþjóðleg samtökum flugmál. Verðlaunin voru afhent við hátíðlega athöfn í Gíbraltar í gærkvöldi en Birgir Jónsson, forstjóri Play, er á staðnum og veitti þeim viðtöku.

„Í rökstuðningi fyrir valinu segir að Play hafi skarað fram úr með viðskiptamódeli sínu sem byggist á að flytja farþega á milli Bandaríkjanna og Evrópu með hagkvæmlega staðsetta heimahöfn á Íslandi. Play hafi einnig sýnt ráðdeild með því að teygja sig ekki of langt, heldur halda sig við sparneytnar og hagkvæmar Airbus A320/321neo farþegaþolur sem henta einstaklega vel á þessum flugleggjum,“ segir í tilkynningu.

Þar er jafnframt skrifað að í rökstuðningi CAPA segir að stjórnendur Play hafi hafi staðsett fyrirtækið vel fyrir framtíðina með áherslu á stafrænar lausnir og sjálfbærni sem einum af grunnstoðum fyrirtækisins. Eins hafi íslensk flugfélagið sýnt mikla seiglu á krefjandi tímum með því að skila rekstrarhagnaði á þriðja ársfjórðungi 2022.

„Að stofna nýtt flugfélag er nógu erfitt fyrir, en að gera það í svo krefjandi árferði með eins góðum árangri er einstakt. Það er því með mikilli ánægju sem CAPA hefur valið Play sem besta nýja flugfélagið árið 2022,“ segir Marco Navarria, talsmaður hjá CAPA, í tilkynningu frá CAPA.

„Það er afar ánægjulegt að fá svona alþjóðlega viðurkenningu á því sem við erum að gera og því frábæra starfi sem starfsfólk Play hefur unnið við krefjandi aðstæður. Þetta er gott veganesti til að fara með inn í komandi ár og veitir okkur aukinn kraft til að halda áfram að gera vel og halda áfram að byggja upp félag sem mun reynast ferðamönnum góður og hagkvæmur kostur,“ segir Birgir Jónsson, forstjóri Play.