Eini Daninn segir upp

Farþegar SAS á leið í flug frá Kaupmannahöfn. MYND: KS

Það er löng hefð fyrir því að yfirstjórn flugfélagsins SAS sé skipuð fulltrúum Noregs, Svíþjóðar og Danmörku enda hafa skandinavísku ríkin þrjú lengi farið með meirihluta í þessu stærsta flugfélagi Norðurlanda. Norðmenn seldu reyndar hlut sinn sumarið 2018 en áfram er einn Norðmaður í framkvæmdastjórn SAS enda eru umsvif flugfélagsins mikil þar í landi.

Daninn í framkvæmdastjórninni er svo Simon Pauck Hansen sem titlaður er aðstoðarforstjóri. Hann tilkynnti hins vegar í byrjun vikunnar að dagar hans hjá SAS væru taldir eftir 26 ára starf. Í viðtali við ferðaritið Checkin segir Hansen að skýringin á uppsögn sinni skrifist á marga þætti en þyngst vegi að hann vilji einfaldlega reyna fyrir sér á öðrum vettvangi.

Í framkvæmdastjórn SAS sitja í dag sjö framkvæmdastjórar og þar af fyrrnefndur Hansen og Norðmaðurinn Kjetil Håbjørg. Með þeim eru fjórir Svíar og einn Finni. Forstjórinn er svo Hollendingurinn Anko van der Werff en hann er fyrsti útlendingurinn stýrir flugfélaginu því hingað til hafa forstjórarnir allir komið frá Skandinavíu.

Hvort Dani fylli skarð Hansen á eftir að koma í ljós en Kastrup flugvöllur hefur lengi verið helsta starfsstöð SAS.

Það má svo rifja upp hér í lokin að árið 2015 ræddi Túristi við Hansen um samstarf SAS og Icelandair. Þegar þarna var komið sögu hafði Icelandair nýverið tilkynnt um nýjan áfangastað, Chicago í Bandaríkjunum, sem lengi hefur verið eitt af höfuðvígum SAS vestanhafs. Skandinavíska félagið svarið um hæl með því að hefja sölu á flugi til Íslands frá Kaupmannahöfn og bætti einnig við flugi frá dönsku höfuðborginni til Boston en í þeirri borg hafði Icelandair fengið að athafna sig án nokkurrar samkeppni við önnur norræn flugfélög.

Á skrifstofum Icelandair við Reykjavíkurflugvöll komu þessi viðbrögð SAS mörgum á óvart samkvæmt heimildum Túrista enda höfðu félögin átt í nánu samstarfi um langt skeið. Simon Pauck Hansen gerði þó lítið úr þessu öllu saman.

„Chicago er stórborg og staðsetning hennar hentar flugflota Icelandair vel. Það var algjör tilviljun að við kynntum flugið til Boston og Keflavíkurflugvallar á sama degi en ég get skilið að sumir sjái þetta með öðrum hætti. Við viljum hins vegar vera með okkar eigin ferðir til stóru áfangastaðanna og Boston er einn af þeimm, ” sagði Hansen í viðtali við Túrista.

Hann bætti því við það væru alls ekki uppi áform um það hjá SAS að hætta samstarfinu við Icelandair og Hansen sagði að það myndi koma sér á óvart ef stjórnendur Icelandair myndu slíta samstarfinu.

Og nú sjö árum síðar er samvinna félaganna tveggja ennþá við lýði.

Eins og áður hefur verið fjallað um þá er staða SAS mjög veik þessi misserin. Félagið nýtur gjaldþrotaverndar fyrir bandarískum dómstólum og reynir með þeim hætti að endurskipuleggja fjárhag sinn.