Uppfærð vetraráætlun Play gerir ráð fyrir að þotur félagsins muni fljúga sjaldnar til höfuðborga Þýskalands og Írlands í byrjun næsta árs. Ferðirnar héðan til Berlínar verða samtals tuttugu í janúar og febrúar eða fjórtán færri en lagt var upp með í haust. Frá og með byrjun mars er áætlunin í takt við það sem áður var.
Samdrátturinn í Dublin er minni því ferðunum þangað hefur verið fækkað úr 43 niður í 35 fyrstu tvo mánuði næsta árs. Birgir Olgeirsson, talsmaður Play, segir í svari til Túrista að þessar breytingar tengist að hluta til því hléi sem gert verður á flugi Play til New York eftir áramót. Því þörfin fyrir Evrópuflug verði minni þegar tengifarþegar hafi úr minna að moða í flug til Bandaríkjanna.
„Við erum auðvitað alltaf að sníða áætlunina að eftirspurn,“ bætir Birgir við.
Eins og Túristi fjallaði um fyrr í vetur þá felldi Play niður allt flug til Stewart flugvallar í New York í nærri sex vikur eftir áramót.