Fyrsta flugið Play til Varsjár verður 3. apríl 2023 en flogið verður tvisvar í viku til loka októbermánaðar. Nýtt sendiráð Íslands í Varsjá var einmitt opnað í gær 1. desember. Sendiherra Íslands í Póllandi er Hannes Heimisson. Við opnunina ræddi Þórdís Kolbrún Reykfjörð Gylfadóttir, utanríkisráðherra Íslands, mikilvægi sendiráðsins fyrir aukna samvinnu ríkjanna á sviði sjávarútvegs, orkumála og ferðaþjónustu.
Í fréttatilkynningu um flugið til Varsjár segir Birgir Jónsson, forstjóri Play:
„Þetta er spennandi skref sem við tökum hjá PLAY með því að fljúga til Varsjár. Þetta er borg sem lætur engan ósnortinn og ég er sannfærður um að hún mun ekki aðeins höfða til þeirra rúmlega 20 þúsund Pólverja sem búa á Íslandi heldur einnig Íslendinga sjálfra. Þetta er fimmti nýi áfangastaðurinn sem við kynnum á skömmum tíma sem byggir undir metnaðarfullt leiðakerfi sem við munum bjóða upp á árið 2023.“
Um 10 milljónir ferðamanna heimsóttu Varsjá árið 2019 fyrir heumsfaraldurinn, um þriðjungur voru útlendingar. Bretar voru fjölmennastir í þessum hópi en næstir komu Þjóðverjar og Úkraínumenn.