Eftir að hafa misst Primera Travel veldi sitt til Arion banka sumarið 2019 þá stofnaði Andri Már Ingólfsson ferðaskrifstofuna Aventura sem hóf að selja Íslendingum ferðir út í heim snemma árs 2021. Á þeim tíma gerði heimsfaraldurinn þess háttar rekstri erfitt fyrir en engu að síður opnaði Aventura líka útibú í Danmörku í lok þarsíðasta árs.
Og nú hefur Aventura keypt þrotabú dönsku ferðaskrifstofunnar Detur en kaupverðið mun skipta milljónum danskra króna samkvæmt frétt danska ferðamiðilsins Standby. Með viðskiptunum eignast Aventura bæði vörumerki og viðskiptavinaskrár Detur en einnig heimasíður á hinum fjórum Norðurlöndunum.
Nýr eigandi er hins vegar ekki skuldbundinn gagnvart fyrrum viðskiptavinum eða kröfuhöfum hins gjaldþrota Detur.
Það voru um 20 þúsund Danir sem fóru í sólarlandaferðir á vegum Detur í fyrra og flestir til Tyrklands. Framkvæmdastjóri Aventura í Danmörku segir í viðtali við Standby að það verði áskorun að selja ferðir undir heiti Detur vegna þess að mikil neikvæð umræða var um ferðaskrifstofuna í aðdraganda gjaldþrotsins í fyrra.