Af þeim farþegum sem fóru gegnum vopnaleitina í Leifsstöð á síðasta ári þá var 1,7 milljón með erlent vegabréf. Þessi talning hefur um langt árabil verið notuð til að segja til um fjölda ferðamanna hér á landi en hafa ber í huga að útlendingar, búsettir á Íslandi, eru hluti af ferðamannatölunni.

Pólverjar voru til að mynda fimmta fjölmennasta þjóðin í hópi þeirra sem innrita sig í flug hér á landi með erlent vegabréf í fyrr eins og sjá má hér fyrir neðan.

Á sama hátt eru allir Íslendingar, líka þeir brottfluttu, taldir sem heimamenn. Það er sem sagt vegabréfið sem ræður hvernig er talið í Leifsstöð en ekki hvar fólk býr. Það skýrir til að mynda 21 þúsund Kínverja hingað til lands í fyrra þrátt fyrir mjög strangar sóttvarnaraðgerðir á landamærum Kína allt síðasta ár. Kínversku ferðamennirnir hafa því líklega langflestir verið búsettir utan heimalandsins.