Stjórn norska lágfargjaldaflugfélagsins Flyr telur ekki hægt að halda rekstrinum áfram og hefur óskað eftir gjaldþrotaskiptum. Þar með lýkur margra mánaða lífróðri félagsins en stjórnendur Flyr hafa árangurslaust reynt að afla aukins hlutafjár en undirtektirnar hafa verið litlar.
Afkoman hefur heldur ekki verið í takt við spár frá því að fyrsta ferð var farin í lok júní árið 2021. Óseldu sætin hafa verið alltof mörg þrátt fyrir lág fargjöld en Flyr hefur boðið upp á flug innan Noregs en einnig til vinsælla áfangastaða í Evrópu frá Ósló. Oftar en ekki í harðri samkeppni við Norwegian, SAS og fleiri flugfélög.
Í flota Flyr eru 12 þotur og þar af 6 Boeing Max en þeir eru eftirsóttar þessi misserin enda gengur framleiðsla á nýjum eintökum af flugvélunum hægar en vonir stóðu til.