Það eru sjö norrænu flugfélög skráð á hlutabréfamarkað og nú í lok fyrstu viku ársins er samanlagt virði hlutabréfa í félögunum 334 milljarðar króna. Icelandair og Play standa undir nærri fjórðungi upphæðarinnar eða 81 milljarði króna.
Markaðsvirði Icelandair er 69,3 milljarðar á meðan hlutabréfin í Play eru 11,7 milljarða króna virði. Munurinn er sexfaldur en til samanburðar er Norwegian metið á 104,3 milljarða króna og er því verðmætasta norræna flugfélagið. Þar á eftir kemur Finnair og svo Icelandair.
SAS er í fjórða sæti en hlutabréfin í því félagi kosta í dag nærri 50 milljarða króna þrátt fyrir að vera nærri verðlaus því það er yfirlýst markmið stjórnenda flugfélagsins að efna til hlutafjárútboðs síðar á árinu og þá fá núverandi hlutahafar lítið fyrir bréfin sín.
Í neðstu þremur sætunum, á listanum yfir verðmætustu norrænu flugfélögin, er flugfélögin sem fóru í loftið í heimsfaraldarinum. Og sem fyrr eru bréfin í Play mun meira virði en hlutirnir í Norse og Flyr en þessi þrjú hafa öll sótt aukið fé til fjárfesta að undanförnu. Í þeirri aðgerð þurftu norsku flugfélögin að selja nýju bréfin með töluverðum afslætti en þess þurfti ekki hjá hjá Play. Tuttugu stærstu hluthafarnir skuldbundu sig nefnilega til að leggja félaginu til 2,3 milljarða króna á nærri sama verði og bauðst í kauphöllinni.
Lífeyrissjóðurinn Birta og Íslandsjóðir voru meðal þeirra sem nýttu útboðið til að auka hlut sinn í flugfélaginu.