Gengi hlutabréfa í þeim norrænu flugfélögum sem skráð eru markað hækkaði í vikunni ef SAS er frátalið. Bréfin í þessu stærsta flugfélagi Norðurlanda lækkuðu um tvö prósent en líkt og áður hefur komið fram þá verður núverandi hlutafé í félaginu nærri einskis virði þegar efnt verður til hlutafjárútboðs síðar á árinu.
Hástökkvari vikunnar var Finnair en gengi bréfa í finnska félaginu hækkuðu um 11 prósent í vikunni en skýringin liggur að hluta í opnun kínverskra landamæra. Finnair hefur lengi verið stórtækt í flugi til Austurlanda fjær og langvarandi sóttvarnaraðgerðir í löndum eins og Kína og Japan hafa leikið félagið grátt. Áfram heldur þó flugbannið í rússneskri lofthelgi að flækja rekstur Finnair en fjárfestar eru þó bjartsýnni á stöðu félagsins í dag en þeir voru fyrir viku síðan.
Hlutabréfin í Play tóku líka kipp í vikunni og hækkuðu um 8 prósent. Þar með fór markaðsvirði félagsins upp um einn milljarð króna og er í dag 12,6 milljarða kr. Til samanburðar var markaðsvirðið rétt um 9 milljarðar í lok nóvember sl. en hækkunina má helst rekja til hlutafjárútboðs meðal stærstu hluthafa flugfélagsins. Gengið í því útboði var 14,6 krónur á hlut en í dag er gengið ögn hærra eða 14,65.
Í krónum talið þá hækkaði Icelandair um 2,6 milljarða króna í vikunni en hlutfallslega nam hækkunin 3,8 prósentum eins og sjá má hér fyrir neðan. Í heildina eru Icelandair og Play því í dag 84,6 milljarða króna virði.
