Í heimsfaraldrinum urðu flugsamgöngur milli landa fátíðar á löngum köflum en innanlandsflug hélt að mestu áfram. Þessi staða kom harðar niður á Keflavíkurflugvelli en mörgum erlendum flugvöllum því á þeim íslenska einskorðast starfsemin við millilandaflug. Innanlandsflug er hins vegar eðlilegur hluti af rekstri alþjóðaflugvalla víðast hvar annars staðar í heiminum.
Flugsamgöngur milli norskra borga og bæja voru til að mynda blómlegar í heimsfaraldrinum og samdrátturinn á Gardermoen við Ósló árið 2020 því töluvert minni en á Kastrup í Kaupmannahöfn. Sá danski hafði verið fjölfarnasta flughöfn Norðurlanda um langt árabil en missti þann titil yfir til Óslóar.
Og þó umferðin á nýliðnu ári hafi verið nokkuð hefðbundin þá hélt norski flugvöllurinn fyrsta sætinu en naumlega þó eins og sjá má hér fyrir neðan.
Keflavíkurflugvöllur endurheimti svo fimmta sætið á nýliðnu ári eftir að hafa farið niður í það níunda árið 2020. Það fall skrifast á fyrrnefndan skort á innanlandsflugi þar á bæ og ekki verður bætt úr því í bráð. Icelandair ætlar til að mynda að bíða til vorsins 2024 með að taka upp þráðinn í flugi milli Akureyrar og Keflavíkur. Í framhaldinu sér forstjóri félagsins fram á að tengja landsbyggðina með betri hætti við þennan langstærsta alþjóðaflugvöll landsins.