Finnair og Norse Atlantic voru einu norrænu flugfélögin sem fluttu fleiri farþega í desember en í nóvember. Hjá hinum fimm var þróunin á annan veg og mest fækkaði farþegunum hjá SAS milli mánaða. Engu að síður er félagið áfram það stærsta á Norðurlöndum þegar horft er til fjölda farþega.
Af þessum sjö norrænu flugfélögum, sem skráð eru á hlutabréfamarkað, þá var sætanýtingin best hjá Play því þar seldust að jafnaði 83 af hverjum 100 sætum. Hlutfallið var lægra hjá hinum flugfélögunum og áfram er það langlægst hjá nýliðunum í Norse Atlantic. Það félag einbeitir sér að flugi yfir Norður-Atlantshafið frá nokkrum evrópskum borgum en ennþá er sætanýtingin þar á bæ mjög lág. Framförin í desember þó töluverð, bæði í fjölda farþega og sætanýtingu.