Rekstur Ryanair, stærsta flugfélags Evrópu í farþegum talið, skilaði hagnaði upp á 211 milljónir evra síðustu þrjá mánuðina í fyrra. Upphæðin jafngildir um 33 milljörðum króna á gengi dagsins.
Hagnaðurinn var rúmlega tvöfalt hærri á sama tímabili árið á undan en hlutfallslega jukust tekjurnar minna eða um 57 prósent.
Í kynningu á uppgjörinu í morgun sagði Michael O´Leary, forstjóri Ryanair, að nýliðin jólavertíðin hefði verið mjög góð og eins væri ferðamannastraumurinn til Evrópu frá bæði Asíu og Bandaríkjunum öflugur. „Eftirspurn eftir flugmiðum um páskana og í sumar er því góð,“ bætti írski forstjórinn við.
Reikningsárið hjá Ryanair nær frá 1. apríl til 31. mars, árið eftir. Það eru því þrír mánuðir eftir af reikningsárinu hjá félaginu en því er hins vegar lokið hjá Icelandair en í þessarar viku birta stjórnendur íslenska félagsins uppgjör sitt fyrir 2022.
Nokkur þrýstingur er á stjórnendur félagsins að veita ítarlegri upplýsingar um horfurnar í rekstrinum en tíðkast hefur því líkt og Túristi greindi þá hefur einn stærsti hluthafi Icelandair látið í ljós óánægju sína með upplýsingagjöfina til fjárfesta.
Þess má geta að Íslands er eitt fárra ríkja Evrópu sem Ryanair flýgur ekki til. Leiðakerfi félagsins nær nefnilega til allra landa álfunnar nema Íslands, Færeyja, Moldovu og Hvíta-Rússlands. Áætlunarferðir Ryanair til Rússlands og Úkraínu liggja auk þess niðri vegna innrásarstríðs Rússa.
