„Fjárfesting okkar í Play er hugsuð til lengri tíma. Trú okkar á viðskiptalíkani félagsins hefur vaxið frekar en hitt og horfum við mjög björtum augum til framtíðar Play,“ sagði Kjartan Smári Höskuldsson, framkvæmdastjóri Íslandssjóða, við Túrista nú í byrun árs.
Þar fór hann yfir þátttöku Íslandssjóða í 2,3 milljarða króna hlutafjárútboði Play í nóvember síðastliðnum en sjóðastýringafyrirtækið lagði þar til meira fjármagn en sem nam þáverandi eignarhlut.
Með þessari viðbótar fjárfestingu fór sameiginlegur hlutur fjögurra sjóða á vegum Íslandssjóða upp í 9,06 prósent og sjóðastýringafyrirtækið, sem eru í eigu Íslandsbanka, var þriðji stærsti hluthafinn í Play um síðustu áramót.
Í nýliðnum janúar keyptu Íslandssjóðir fleiri hluti í Play og sjóðirnir fjórir áttu því samtals 9,43 prósent í Play um mánaðamótin síðustu. Það er jafn stór hlutur og lífeyrissjóðurinn Birta á í flugfélaginu samkvæmt nýjum hluthafalista flugfélagsins.
Á þeim lista trónir sem fyrr á toppnum Leika fjárfestingar en fyrir því félagi fari þau Kári Þór Guðjónsson, Halla Sigrún Hjartardóttir, Guðmundur Þórðarson og Einar Örn Ólafsson sem jafnframt er stjórnarformaður flugfélagsins. Leika fjárfestingar varð til þegar hlutabréf þessara fjögurra í Play voru sameinuð í eitt félag.
Play birti uppgjör sitt fyrir nýliðið ár þann 15. febrúar næstkomandi en félagið hóf áætlunarflug í lok júní 2021 og tapaði það ár 28,5 milljörðum dollara eða 3,6 milljörðum króna miðað við meðalgengi þess árs.
Tap Play fyrstu níu mánuðina í fyrra nam 4,6 milljörðum króna og tapið frá 1. janúar 2021 til 30. september 2022 því 8,2 milljarðar kr.
Til samanburðar hefur fjárfestar lagt félaginu til samtals 12,6 milljarða króna. Þriðjungur upphæðarinnar safnaðist í opnu hlutafjárútboði í sumarbyrjun 2021 en þar var eftirspurnin áttföld. Þar borguðu fjárfestar annað hvort 18 eða 20 krónur fyrir hvern hlut en verðið ræðst af þátttöku hvers og eins. Í hlutafjárútboðinu í nóvember sl. var gengið 14,6 krónur en þegar Kauphöllin lokað í gær kostaði hver hlutur í Play 13,55 krónur.