Yfir sumarmánuðina eru Bandaríkjamenn fjölmennastir í hópi ferðamanna hér á landi en þar á eftir koma Þjóðverjar og svo Frakkar. Framboð á Íslandsflugi frá þessum tveimur Evrópuríkjum er þó mjög ólíkt. Frá Þýskalandi er nefnilega flogið hingað reglulegu frá fimm borgum á meðan flugið til Keflavíkurflugvallar frá Frakklandi takmarkast að langmestu leyti við París.
Síðastliðið sumar bætti Icelandair þó við flugi til Nice yfir hásumarið og Transavia hélt uppteknum hætti og bauð upp á áætlunarflug hingað frá Nantes frá vori og fram á haust.
Nú ætlar þetta dótturfélag Air France og KLM hins vegar að leggja niður Íslandsflugið frá Nantes. Þetta staðfestir talsmaður flugfélagsins í svari til Túrista en fer þó ekki nánar út í ástæður þessarar ákvörðunar.
Með þessari breytingu fækkar flugsætunum frá Frakklandi til Íslands næsta sumar um alla vega 4000 sæti. Gera má ráð fyrir að það hafi helst verið franskir ferðamenn sem nýttu sér ferðir Transavia í fyrra en héðan flugu nærri 50 þúsund franskir ferðamenn frá byrjun júní og fram í lok september.
Þrátt fyrir að flug milli Nantes og Keflavíkurflugvallar sé dottið út af sumaráætlun Transavia þá munu þotur félagsins halda áfram að fljúga hingað frá bæði Amsterdam og París. En sem fyrr segir er Transavia hluti af Air France-KLM Group en þessi tvö stóru flugfélög hafa látið lágfargjaldaflugfélagi samsteypunnar Íslandsflugið eftir.
Þessi niðurskurður hjá Transavia er sá þriðji sem komið hefur til nú í ársbyrjun því líkt og Túristi hefur áður greint frá þá hætti bandaríska flugfélagið United við að halda úti daglegu flugi hingað frá New York og Wizz Air leggur niður ferðirnar frá London í lok vetrar.
