Norska lágfargjaldaflugfélagið Flyr heyrir nú sögunni til en fyrsta ferð var farin í lok júní 2021 og sú síðasta nú í byrjun þessarar viku. Nítján mánaða ferðalagi Flyr er því lokið en fjárfestar lögðu samtals 1,4 milljarða norskra króna í flugfélagið í fjórum hlutafjárútboðum. Upphæðin jafngildir um 20 milljörðum íslenskra króna en hún dugði þó ekki til að halda taprekstrinum áfram.
Á listum yfir stærstu hluthafa Flyr hafa síðustu tvö ár birst nöfn umsvifamikilla norskra fagfjárfesta en margir þeirra hafa stoppað stutt við og í raun selt sín bréf að loknum hlutafjárúboðum. Kaupendur bréfanna voru oftar en ekki litlir fjárfestar og það er sá hópur sem tapaði langmestu á falli Flyr líkt og bent er á í umfjöllun norska viðskiptablaðsins Dagens Næringsliv.
Rekstrartap Flyr nam 1,5 milljarði norskra króna frá því áætlunarflugið hófst um mitt ár 2021 og fram í lok september 2022 samkvæmt uppgjörum félagsins. Sú upphæð jafngildir 22,3 milljörðum íslenskra króna en gera má ráð fyrir að talan hafi hækkað síðustu þrjá mánuðina í fyrra en ekki liggur fyrir uppgjör fyrir það tímabil.