Allt frá árinu 2018 hefur Icelandair Group verið rekið með tapi en Covid-19 faraldurinn lamaði reksturinn í ársbyrjun 2020 og hafði einnig veruleg áhrif árið eftir. Og neikvæðra áhrifa gætti líka í byrjun síðasta árs. Hins vegar var eftirspurn eftir ferðalögum mikil þegar leið á sumarið og fargjöld almennt hærri en dæmi eru um. Tekjur Icelandair á hvern farþega voru þá hærri en áður.
Það dugði þó ekki til að reksturinn væri réttum megin við núllið í fyrra en litlu munaði því tapið nam 5,8 milljónum bandaríkjadollara eða 786 milljónum króna. Hagnaður fyrir fjármagnsliði (EBIT) nam 2,6 milljörðum króna.
Afkoman á síðasta fjórðungi ársins hefur ekki verið hærri síðan árið 2015, þrátt fyrir stjórnendur Icelandair meti tjónið sem varð vegna ófærðar, dagana fyrir jól, á einn milljarð króna.
„Árið 2022 markar mikinn viðsnúning í rekstri Icelandair. Sterk tekjumyndum með met farþegatekjum á seinni hluta ársins og stórbætt EBIT hlutfall sýnir að viðskiptalíkan félagsins hefur enn og aftur sannað gildi sitt. Við höfum náð vopnum okkar og höldum ótrauð áfram, sterkari en nokkru sinni fyrr, með stærstu flugáætlun í sögu félagsins á þessu ári þegar kemur að tíðni og fjölda áfangastaða.
Stefna okkar og aðgerðir á meðan á faraldrinum stóð gerðu það að verkum að við vorum tilbúin að bregðast við og auka flugframboð hratt til að mæta mikilli eftirspurn. Við tvöfölduðum flugáætlun félagsins á milli ára, fjölguðum áfangastöðum í 51 og fluttum 3,7 milljónir farþega á árinu,“ segir Bogi Nils Bogason, forstjóri Icelandair, í tilkynningu.
