Það var í apríl 2019 sem bandarískur fjárfestingasjóður, PAR Capital Management, keypti nærri 12 prósent hlut í Icelandair og varð stærsti hluthafinn. Bréfin sem sjóðurinn keypti voru gefin út sérstaklega vegna viðskiptanna en þegar þarna var komið við sögu voru hluthafarnir í Icelandair rétt um þrjú þúsund talsins og allir íslenskir.
Óhætt er að segja að staða flugfélagsins hafi verið snúin á þessum tímapunkti því nokkrum vikum áður en PAR Capital keypti sín bréf þá varð Wow Air gjaldþrota og Boeing Max þotur Icelandair voru kyrrsettar.
Það grunaði þó fæsta að þoturnar fengju ekki að fara í loftið aftur fyrr en nærri tveimur árum síðar. Og auðvitað sá enginn fyrir Covid-19 faraldurinn sem var handan við hornið en þegar landamærum var lokað í mars 2020 datt botninn úr rekstri Icelandair.
Flugfélagið þurfti því á auknu fé að halda og haustið 2020 var ráðist í stórt hlutafjárútboð en PAR Capital tók ekki þátt og seldi þau bréf sem sjóðurinn átti. Þar með hvarf útlendingurinn út hluthafahópnum.
Meðal Íslendinga var aftur á móti stemning fyrir útboðinu og til marks um það þá fjölgaði hluthöfunum um rúmlega 10 þúsund. Fleiri hafa svo bæst við því í dag eru hluthafarnir 15.598 samkvæmt því sem fram kom í fjárfestakynningu stjórnenda Icelandair á föstudaginn.
Þar kom líka fram að útlendingar fara samanlagt fyrir 26 prósenta hlut í Icelandair sem er þá ríflega tvöfalt meira vægi en PAR Capital hafði á sínum tíma. Og af þessum 26 prósentum eiga bandarískir fjárfestingasjóðir alla vega 22,26 prósent. Þar er Bain Capital Credit langstærstur með 17,2 prósent.
Sú eign er reyndar skráð á írskt skúffufélag og það kann að skýra afhverju stjórnendur Icelandair birtu ekki upplýsingar um hvernig erlenda eignhaldið skiptist milli landa eða heimsálfa. Því samkvæmt reglum ESB, sem einnig gilda á hér á landi, þá verða evrópsk flugfélög að vera að meirihluta í eigu evrópskra hluthafa. Bandarískir fjárfestar geta því ekki eignast meira en 49 prósent hlut líkt og fjallað var um á sínum tíma í tengslum við mögulega fjárfestingu Indigo Partners í Wow Air.