Fraktflugfélagið Bláfugl hefur sótt um flugrekstrarleyfi í Slóvakíu og er þetta liður í því að komast inn á nýja markaði. Þetta kemur fram í tilkynningu frá Avia Solutions Group sem keypti Bláfugl stuttu fyrir heimsfaraldur. Innan Avia Solutions Group eru nokkur leiguflugfélög sem sérhæfa sig bæði í farþega- og fraktflugi.
Audrone Keinyte, forstjóri Bláfugls, segir í tilkynningu að staðsetning Slóvakíu, inn í miðri Evrópu, veiti fjölda tækifæra til að stækka flugfélagið og styrkja vörumerki þess á meginlandinu.
Umsvif Bláfugls í fraktflugi til og frá Íslandi eru ekki ýkja mikil og voru rétt um 8 prósent af heildarumsvifunum í hittifyrra að sögn þáverandi framkvæmdastjóra.
Bláfugl gerir engu að síður út á íslenskt flugrekstrarleyfi og hefur Félag íslenskra atvinnuflugmanna (FÍA) átt í áralangri deilu við flugfélagið. Í september árið 2021 féll til að mynda dómur í Félagsdómi þar sem uppsagnir Bláfugls á öllum flugmönnum, sem voru félagar í FÍA, voru dæmdar ólöglegar. Ennþá er deilan þó óleyst eins og formaður FÍA rifjaði upp nýverið og gagnrýndi þá harðlega forystu Samtaka atvinnulífsins.
