Það voru um 812 þúsund farþegar sem lögðu leið sína um Flugstöð Leifs Eiríkssonar fyrstu tvo mánuði ársins. Þetta er skiljanlega miklu fleiri en á sama tíma í fyrra og hittifyrra þegar heimsfaraldurinn setti allar samgöngur milli landa úr skorðum.
Í samanburði við janúar og febrúar árið 2020 hefur farþegaum fjölgað en ennþá er töluvert í að farþegarnir verði álíka margir og á árunum 2017 til 2019 þegar umferðin náði hámarki. Þessi ár jukust umsvif Icelandair umtalsvert en samt náði Wow Air að verða stærra en keppinauturinn, í farþegum talið, í febrúar árið 2018.
Þessi hraði vöxtur félaganna tveggja reyndist hins vegar ekki arðbær því bæði skiluðu miklu tapi árið 2018 og Wow Air varð gjaldþrota í mars 2019. Það ár var Icelandair einnig í mínus sem skrifaðist helst á kyrrsetningu Boeing Max þotanna.
Nú er Play komið til sögunnar og á næstu mánuðum stækkar flugfloti þess félags úr sex þotum í tíu. Þar með ætti farþegunum á Keflavíkurflugvelli að fjölga umtalsvert en farþegaspá Isavia gerir ráð fyrir að 7,8 milljónir farþega fari um flugstöðina í ár.
Spáin fyrir fyrstu tvo mánuði ársins hljóðaði upp á 864 þúsund farþega en sem fyrr segir voru þeir 812 þúsund. Mismunurinn jafngildir sex prósentum.