Það er sannarlega ólga á evrópskum vinnumarkaði og hún hefur ekki síst haft áhrif á samgöngur og ferðaþjónustu það sem af er ári. Viðamiklar verkfallsaðgerðir nánast lömuðu samgöngur í Frakklandi í vikunni, brautarsamgöngur í Bretlandi hafa orðið fyrir verulegum truflunum vegna verkfalla og á Spáni fóru flugumferðarstjórar á 16 flugvöllum í verkfall í febrúarbyrjun. Svo er skemmst að minnast verkfalls félaga Eflingar sem var ekki síst beint að hótelum í Reykjavík.
Í Þýskalandi fóru félagar í næst stærstu verkalýðssamtökum landsins, Verdi, eða Vereinte Dienstleistungsgewerkschaft, í verkfall 17. febrúar og beindust aðgerðir að flugvöllum í Köln, Düsseldorf og Frankfurt. Barátta Verdi heldur áfram og hafa verið boðuð verkföll öryggisstarfsfólks á mánudag á flugvöllum í norðanverðu landinu, þar á meðal í höfuðborginni Berlín og einnig á smærri flugvöllum eins og í Hamborg, Hanover og Bremen. Búist er við að mörgum flugferðum verði aflýst og miklar biðraðir myndist.
Í tilkynningu frá Verdi segir að árum saman hafi staðið deilur um þær greiðslur sem öryggisstarfsfólk fær fyrir næturvaktir og vinnu um helgar og á hátíðum. Engar kjarabætur fyrir yfirvinnu hafi fengist frá árinu 2006 en viðræður hafi staðið frá 2013 án árangurs.
Ástæða þess að upp úr sýður núna í Þýskalandi og víðar í Evrópu er hækkað verð á matvælum og bensíni sem kemur auðvitað verst niður á fólkinu með lægstu launin. Þessi lífskjaraskerðing, sem rekja má til áhrifa af stríðinu í Úkraínu, kemur í kjölfar kórónaveirufaraldursins sem leiddi til atvinnumissis eða verulegrar kjaraskerðingar hjá mörgu vinnandi fólki – ekki síst þeim sem störfuðu við samgöngur og ferðaþjónustu.
Meðal flugfélaga sem verða mjög fyrir barðinu á þessum aðgerðum á mánudag eru Lufthansa, EasyJet og Air France-KLM. Bæði íslensku flugfélögin áætla flug til Brandenburg-flugvallar í Berlín á mánudag, Play kl. 6.00 og Icelandair kl. 7.40. Búast má við að brottfararfarþegar verði fyrir töfum vegna verkfallsaðgerðanna.
13.3. Athugasemd: Icelandair aflýsti flugi til Berlínar kl. 7.40
