Það bárust ríflega eitt hundrað umsóknir þegar Icelandair auglýsti í síðasta mánuði eftir flugmönnum með reynslu fyrir sumarvertíðina. Um er að ræða tímabundnar stöður en þrátt fyrir það sendi á fjórða tug flugmanna og flugstjóra Play inn umsókn líkt og Túristi greindi frá eða nærri helmingur þeirra sem unnið hafa hjá félaginu í vetur.
Það lá fyrir að Icelandair myndi ekki ráða marga og samkvæmt heimildum Túrista hafa nú tíu umsækjendur fengið tilboð um störf á komandi sumarvertíð, þar af sjö flugstjórar hjá Play.
Sá fjöldi samsvarar um það bil þeim fjölda flugstjóra sem þarf til manna eina þotu og gott betur en flugfloti Play stækkar úr sex þotum í tíu nú í vor.
Til að fljúga öllum þessum flugvélum þarf um sextíu flugstjóra og jafnmarga flugmenn en líkt og fram kemur hér að ofan eru það sjö flugstjórar sem hafa fengið tilboð um að færa sig frá Play til Icelandair og vinna þar sem flugmenn.
Við þessa breytingu lækka grunnlaun viðkomandi um fimmtung því flugmaður hjá Icelandair fær 860 þúsund kr. á mánuði í grunnlaun á meðan flugstjóri hjá Play er með 1,1 milljón kr. Til samanburðar eru flugmannalaunin hjá Play mun lægri eða eða 470 til 590 þúsund krónur.
Akstursstyrkir, dagpeningar og fleira bætast við þessar upphæðir hjá flugfélögunum báðum en vinnuálagið hjá áhöfnum Icelandair mun almennt vera minna en hjá keppinautnum. Icelandair býður jafnframt upp á sætaferðir til og frá Keflavíkurflugvelli á meðan áhafnir Play þurfa sjálfar að koma sér út á flugvöll.
Kjör flugverja Play eru lakari og skýrir það að hluta til þá staðreynd að einingakostnaður flugfélagins er lægri hjá Icelandair. Stjórnendur Play hafa einmitt lagt mikla áherslu á hinn lága einingakostnað í fjárfestakynningum og sagt hann gefa félaginu forskot í samkeppninni líkt og forstjóri Play fór yfir hér á síðum Túrista nýverið.
Sú staðreynd að hluti flugstjóra Play virðist reiðubúinn til að ráða sig tímabundið til Icelandair á lægri launum kann þó að kalla á endurskoðun á kjörunum. ASÍ gagnrýndi það á sínum tíma að kjarasamningar flugfreyja og -þjóna hjá Play voru gerðir, áður en nokkur var ráðinn til að sinna þessum störfum, af stéttarfélagi sem samdi fyrir hönd flugmanna Wow Air en hafði legið í dvala frá gjaldþroti þess félags í mars 2019.
