Seinka varð flugi Niceair frá Kaupmannahöfn til Akureyrar í gær þar sem þotan sem félagið er með á leigu var kyrrsett vegna deilu leigusala og eigenda flugvélarinnar samkvæmt frétt Mbl. Þotunni var svo flogið tómri til Írlands seinnipartinn í gær en farþegar Niceair flugu til Akureyrar með annarri leiguvél.
Á morgun er á dagskrá ferð Niceair til Tenerife og sú ferð er á áætlun að sögn Þorvaldar Lúðvíks Sigurjónssonar, framkvæmdastjóra Niceair. Þota er væntanleg til Akureyrar seinnipartinn í dag og þar með „búið að redda helginni,“ segir Þorvaldur. Hann bætir við að unnið sé að því að finna langtímalausn á stöðunni og það líti vel út.
Þotan sem fljúga mun farþegum Niceair til Tenerife er í eigu Centrum Air sem er leiguflugfélag frá Úsbekistan sem stofnað var nú í byrjun árs.