Sú kvöð hvílir á stjórnendum SAS að birta opinberlega uppgjör fyrir hvern einasta mánuð. Ástæðan er sú að þetta stærsta flugfélag Norðurlanda fer nú í gegnum svokallað Chapter-11 ferli með samþykkti bandarískra dómstóla. Bókhaldið þarf að vera opið á meðan.
Í takt við það þá birti SAS nú í morgun upplýsingar um afkomuna í mars og niðurstaðan er tap upp á um 400 milljónir sænskra króna. Sú upphæð jafngildir um 5,3 milljörðum króna. Þetta er ríflega helmingi minna tap en í febrúar og rétt um þriðjungur af tapinu í janúar.
Fyrir páska var óskað eftir því að áhugasamir stórfjárfestar myndu gefa sig fram ef þeir hefðu áhuga á að taka þátt í komandi hlutafjárútboði SAS. Þau áform eru hins vegar í lausu lofti í dag þar sem bandarískur dómari setti spurningamerki við þátttöku danska ríkisins í útboðinu.