Þessar takmarkanir á innanlandsflugi í Frakklandi voru raunar lögfestar 2021 en nokkur flugfélög höfðu beint erindi til Framkvæmdastjórnar Evrópusambandsins um að kannað yrði lögmæti þessarar þvingunar og héldu áfram að fljúga. Air France dró úr innanlandsflugi 2021 en fékk í staðinn stuðning vegna heimsfaraldursins. Öðrum félögum var ekki heimilað að fylla það skarð sem Air France skildi eftir á innanlandsmarkaðnum á sama tíma.
Framvegis skerðast möguleikar fólks á innanlandsflugi frá París til borga eins og Nantes, Lyon og Bordeaux en tengiflug verður heimilt. Reglan um að ef í boði er tveggja og hálfs stundar lestarferð þá megi ekki fljúga er gagnrýnd harðlega – ekki síst vegna þess að þar með nær hún ekki til ferða frá París til Miðjarðarhafsborga eins og Marseille. Það tekur hraðlestina nefnilega rétt tæpar þrjár stundir að fara þessa leið þannig að heimilt er að starfrækja áætlunarflug.
Hraðlest kemur á stöðina í Lyon – MYND: Unsplash/Julien Rocheblave
Í lögunum er tekið fram að skilyrði fyrir því að fella niður flug á tiltekinni leið er að lestarsamgöngur séu tíðar og góðar. Fólk verður að geta ferðast fram og til baka sama dag með átta stunda millibili. Þá verður að vera hægt að sinna öllum þeim fjölda sem þarf að ferðast á viðkomandi leið. Annars má fljúga.
Umhverfisssamtök gagnrýndu þessa ákvörðun 2021 vegna þess hversu skammt hún náði. Þau hafa viljað setja enn meiri takmarkanir á flugferðir. Þingmenn Græningja hafa viljað setja algjört bann við flugi einkaþota. Ríkisstjórnin hefur boðað hærri loftslagsskatt á flug á næsta ári.