Það stefnir í að áætlunarferðir á vegum Play í sumar verði um tíu prósent fleiri en Wow Air bauð upp yfir aðalvertíðina árið 2016. Áfangastaðirnir hjá Wow Air voru samt nokkru færri en Play ætlar að sækja á í sumar.
Þannig flugu þotur Wow Air til 25 borga í Norður-Ameríku og Evrópu sumarið 2016 en áætlun Play gerir ráð fyrir áætlunarferðum til 33 borga næstu mánuði. Hjá Wow Air voru ferðirnar aftur á móti tíðari til vinsælustu áfangastaðanna en raunin er hjá Play. Þar með sköruðust leiðakerfi keppinautanna, Icelandair og Wow Air, aðeins í 11 tilvikum þetta sumar samkvæmd ferðagögnum Túrista. Núna eiga Icelandair og Play aftur á móti eiga í beinni samkeppni í 21 borg.
Það er nærri því tvöföldun frá því í fyrra og breyting skrifast ekki bara á aukin umsvif Play því Icelandair hefur líka bætt við borgum sem helsti keppinauturinn sat einn að í fyrra eins og sjá má á töflunni hér fyrir neðan.
Í heildina tekið verður Play í samkeppni við Icelandair á 64 prósentum áfangastaða sinna en til samanburðar þurfti Wow Air aðeins að etja kappi við Icelandair í 44 prósent þeirra borga sem það félag flaug til sumarvertíðina fyrir 7 árum síðan.
Wow Air hagnaðist um rúmlega 4 milljarða króna þetta ár og Icelandair um 14 milljarða en það síðarnefnda slapp þá við íslenskan keppinaut á sjötíu prósent sinna áfangastaða yfir aðalferðamannatímabilið árið 2016. Nú í sumar þarf Icelandair aftur á móti að eiga við Play á 43 prósentum áfangastaða sinna.
Slagurinn milli íslensku félaganna í sumar verður því mun harðari og ljóst að stjórnendur Play sjá meiri tækifæri í að skora Icelandair á hólm en Skúli Mogensen gerði árið 2016. Árið eftir harðnaði samkeppni félaganna tveggja hins vegar töluvert og hagnaðurinn hjá Icelandair dróst saman og Wow Air var rekið með tapi. Þá fór olíuverð líka hækkandi en var samt þónokkru lægra en það er í dag.
